Acari vijon të ketë mbërthyer Qarkun e Dibrës pasi temperaturat gjatë natës kanë zbritur në – 17 gradë celsius. Më problematike situata mbetet në zonat e thella malore ku ka prezencë të madhe të akullit në rrugë. Fshatrat e Krastës, Ostrenit e Trebishtit si dhe Tërnova e Madhe e Zerqanit janë pa komunikim për shkak të sasisë së madhe të borës dhe akullit në rrugë.
Në Bashkinë e Dibrës fshatrat e Lurës, Kalasë së Dodës, Selishtës etj janë pa komunikim. Probleme ka edhe me furnizimin me ujë të pijshëm. Ngrirja e tubacioneve ka lënë pa ujë banorë në qytetin e Peshkopisë por edhe të Bulqizës si pasojë e ngrirjes së tubacioneve dhe çisternave. Pa ujë të pijshëm janë edhe fshatrat Shumbat e Sohodoll në Dibër.
Sa i përket energjisë elektrike grupet e OSHEE e kanë kthyer në normalitet, duke bërë të mundur furnzimin me rrymë të gjithë qarkut Dibër.
