Gjatë këtyre ditëve ku temperaturat kanë zbritur disa gradë nën zero, të gjithë ata që përdorin rrugën Lapidari Zenisht – Urakë – Rrëshen, po përballen jo vetëm me gropa të shumta e baltë, por edhe me akull në rrugë.
Siç duket nga pamjet ky segment rruge në afërsi të urës së Urakës mbulohet nga akulli çdo natë për shkak se pozicioni gjeografik nuk e favorizon nga rrezet e diellit gjatë ditës.
Edhe ai pak akull që mund të shkrijë gjatë ditës, në mbrëmje rikthehet pasi temperaturat zbresin disa gradë nën zero.
Jashtë kameras drejtuesit e mjeteve shprehen se kjo rrugë është shumë problematike pasi nuk ka asnjë lloj mirëmbajtje dhe sigurie.
Prania e akullit përbën rrezik të shtuar për ta pasi nëse nuk janë të vëmendshëm drejtuesit e mjeteve mund të pësojnë aksident. Megjithëse Autoriteti Rrugor Shqiptar është zotuar se këtë rrugë do ta marrë në inventarin e saj, deri tani nuk ka bërë asgjë, pasi rruga vijon të jetë në mëshirë të fatit dhe nën përgjegjësinë e askujt.
Ndërsa, banorët e shumë fshatrave të Matit por edhe ata që lëvizin drejt Mirditës apo Kosovës, duhet të përballen me gjendjen e degraduar të aksit, sa herë kalojnë në të.
