Shqiptarët, sërish në krye të dëbimeve nga Britania: Pesë vite radhazi në listën e zezë

Për të pestin vit radhazi, shqiptarët renditen në vendin e parë për sa i përket numrit më të madh të të dëbuarve nga Anglia.

Të dhënat më të fundit të Ministrisë së Punëve të Brendshme (Home Office) tregojnë se për periudhën Tetor 2025-Tetor 2026 janë dëbuar 2,247 shqiptarë pa leje qëndrimi.

Sipas Home Office, shqiptarët renditen të parët për numrin e dëbimeve, duke lënë pas rumunët, brazilianët, indianët dhe polakët.

Pothuajse shumica e 2,247 të dëbuarve shqiptarë janë persona të cilët kanë qenë të dënuar për vepra të ndryshme penale. Pas kryerjes së 40% të dënimeve të marra, ata janë kthyer në Shqipëri me avionë të posaçëm. 80% e tyre, sipas Home Office, ishin të dënuar si të përfshirë në shitjen e kokainës.

Një tjetër e dhënë nga Home Office tregon se "shtetasit shqiptarë përbëjnë grupin më të madh për nga shtetësia në mesin e personave të kthyer në kuadër të procedurave të lidhura me azilin, duke zënë një të katërtën (24% ose 2,831 persona) të të gjitha kthimeve të tilla deri në mars 2026."

Gjatë vitit 2022, mbi 12 mijë shqiptarë mbërritën me gomone në Angli, duke kaluar Kanalin e La Manshit.

Home Office thekson se gjatë vitit 2025, 53% e totalit të personave të mbërritur me gomone, tashmë të dëbuar, janë shqiptarë.

Gjatë periudhës nga 1 shkurti 2025 deri më 31 janar të këtij 2026, gjithsej 2,835 emigrantë u transportuan me avionë jashtë Mbretërisë së Bashkuar, me një kosto totale prej 13.8 milionë paundësh, ekuivalente me afro 5,000 paund për person.

Dëbimi me një avion privat të tipit Airbus 321, i 47 shqiptarëve, i ka kushtuar Home Office 22.000 stërlina për secilin prej këtyre 47 personave.

Një zëdhënës i Ministrisë së Brendshme britanike (Home Office) deklaroi:

"Më shumë se 80,000 emigrantë që kanë hyrë ilegalisht dhe shtetas të huaj që kanë kryer vepra penale janë kthyer që nga zgjedhjet e korrikut 2024, një rritje prej 41 për qind."

Shqipëria ishte vendi me numrin më të madh të fluturimeve çarter, me 42 avionë të marrë me qira për të kthyer në atdhe 1,810 emigrantë gjatë kësaj periudhe kohore, të cilët kishin hyrë ilegalisht duke shkelur ligjin e emigracionit ose kishin kryer vepra penale.