Fshatrat e Bulqizës vijojnë të përballen me gjendjen e amortizuar të rrugëve që i lidhin ato me qendrat urbane. Kjo është rruga e fshatit Gollobordë në Njësinë Administrative Zerqan në Bashkinë e Bulqizës. Kjo rrugë e cila përdoret edhe për të kaluar në shtetin e Maqedonisë së Veriut, sipas drejtuesve të mjeteve dhe banorëve nuk mirëmbahet.
Gropat e mëdha të shfaqura në të gjithë gjatësinë e kësaj rruge e bëjnë kalimin në të tepër të vështirë. Banorët thonë se prej 4 vitesh, askush nuk ka ndërhyrë më për riparimin e saj. Më problematike situata paraqitet gjatë stinës së dimrit, kur ka reshje shirash apo dhe ngrica, e në këtë mënyrë kalimi në të në shumë segmente bëhet pothuajse i pamundur.
Aksi në fjalë përdoret edhe për të lidhur dy njësitë administrative atë të Bulqizës dhe Librazhdit, por problemet në të janë prej vitesh.