Rama: Paketa e Maleve, Histori Suksesi; Protestuesit, "Sorrat dhe Korbat" e Së Kaluarës
Kryeministri Edi Rama, në një bashkëbisedim në rrjetet sociale, ka zgjedhur të komentojë sërish protestën, e cila sot hyn në ditën e saj të 52-të, duke thelluar kthesën në qëndrimin e tij.
Kryeministri u shpreh se historia e flamingove është historia e Shqipërisë së re, e cila e ka bërë atë të mësojë dhe të mendojë më thellë. Ai shtoi se Paketa e Maleve do të jetë një histori suksesi e së ardhmes, gjë që sipas tij u ka munguar njerëzve. “Zhurma dhe akuzat shpifëse, ndarjet, vetëm mjegullojnë sytë e atyre që merren me to. Paketa e maleve do të jetë një histori e madhe suksesi për shqiptarët,” theksoi Rama.
Ai vazhdoi, “Unë po shkoj përtej, aty ku realiteti i hedh poshtë të gjitha broçkullat që thuhen për mënyrën se si mund të zhvillohet ekonomia e maleve. Realiteti tregon se njerëzit që punojnë dhe fitojnë, mund të bëhen viktima të sulmeve agresive dhe të ulëta mbi djersën e tyre, sakrificat e tyre, gjakun e tyre.”
Rama bëri thirrje të trokasin në dyert e ekonomive dhe bujtinave malore, duke i cilësuar ato si “Shqipëria ndaj shqipërisë së dembelëve që duan vetëm lekë dhe nuk lënë gjë pa thënë për të gjithë të tjerët që lekun e fitojnë me punë. Shpifin e shajnë për këdo, aty janë shqiptarët realë të punës. Shqipëria që do të bëhet Zvicra e vogël në ato male.”
Për reflektimet personale nga “bulevardi i flamingove”, Kryeministri u shpreh se do t'i ndajë në ditët në vijim. “Historia e flamingove është historia e Shqipërisë së re, kurse jo e sorave dhe korbave që e kanë marrë peng dhe e kanë kthyer në një shëmbëlltyrë simetrike me jashtënxjerrjen e asaj opozite që nuk dihet më ku është. Nuk ka asnjë lidhje me historinë e të ardhmes së Shqipërisë, ka lidhje vetëm me të shkuarën, që është shumë shqetësuese për të parë historinë. Ekstremet e majta dhe të djathta që vijnë për të sjellë më të keqen për një vend përmes sharlatanësh, injorantësh dhe dështakësh e zemërakësh të pangushëllueshëm.”
Ai përsëriti se Paketa e Maleve është histori e të ardhmes. “Këta që bërtasin për një Shqipëri që nuk duan të huaj, janë më e keqja e këtij vendi. Shumë respekt për flamingot që më kanë mësuar shumë dhe më kanë bërë të mendoj thellë. Vetëm refuzim dhe madje, përveç refuzimit, edhe neveri për ata që janë sorrat dhe korbat e mbledhura të këtij vendi, që ulërijnë dhe shajnë, këndojnë në mënyrë vulgare dhe u duket se po ndryshojnë botën. Nuk kanë shanse këtu në Shqipëri,” përfundoi Rama.
