Skuadra matjane e futbollit “Burreli” ka marrë udhëzimet e fundit nga stafi teknik këtë të martë, një ditë para ndeshjes zyrtare që do të luajë të mërkurën e 26 Marsit në transfertë ndaj Besës së Kavajës. Djemve të Burreli u është kërkuar nga stafi teknik angazhim maksimal dhe asnjë gabim në këtë përballje e cila ka një rëndësi të veçantë pasi është ekipi direkt rival për zonën e play off-it. Ndërkohë, mbrojtësi i skuadrës së Burrelit, Kreshnik Fetaj u shpreh se gjendja e kolegëve të tij është shumë e mirë dhe se qëllimi kryesor mbetet marrja e pikëve në këtë përballje, ndonëse takimi konsiderohet i vështirë. Fetaj u shpreh gjithashtu se jo vetëm ndeshja ndaj Besës por çdo ndeshje ka rëndësi maksimale për të arritur aty ku është objektivi i Burrelit, pjesmarrja në play-off.

Ndeshja e nesër mes Besës së Kavajës dhe Burrelit do të luhet në orën 12 e 30 minuta, në stadiumin “Arena e Demave” të kompleksit “Partizani” në Tiranë.

 Bujqësia, edhe pse është një sektor i cili ka problemet e tij për shkak të rritjes së madhe të kostove të punimit të tokës apo procesve të tjera, me të merret thuajse vetëm mosha e tretë, për shkak të largimit masiv të të rinjve në emigracion. Ky është 75-vjeçari Xhevdet Kaba, nga fshati Pilafe i Njësisë Administrative Tomin në Bashkinë e Dibrës. Xhevdeti tregon se merret me bujqësi për dy arsye; së pari është se nuk mund ta shohë tokën e tij të lënë djerr dhe së dyti, për të ndihmuar sadopak me prodhimin që merr nga toka pensionin i cili sipas tij është i pamjaftueshëm. Për 75-vjeçarin Kaba, edhe shteti nuk po e ndihmon si duhet sektorin e bujqësisë.

Nga ana tjetër, 75-vjeçari Xhevdet Kaba thotë se pensioni që merr ai dhe bashkëshortja e tij nuk mjaftojnë as për medikamente pasi të dy vuajnë nga një sërë sëmundjesh.

Largimi masiv i të rinjve vihet re më shumë në fshatra të qarkut Dibër, ku kanë mbetur thuajse në çdo shtëpi vetëm mosha e tretë.

Tre vëllezër nga fshati Melan i Dbirës prej tre dekadash i janë përkushtuar frutikulturës. Medin Kryemadhi thotë se vazhdojnë aktivitetin e lënë nga babai i tyre. Sipas Medinit, sipërfaqja prej 15 hektarësh është e kultivuar me lloje të ndryshme frutorësh që nga qershia, molla e arra. Të vetmen ndihmë që kanë patur nga shteti, sipas Medin Kryemadhit ka qenë mbështetja me naftë falas në vitet e fundit, ndërsa nuk kanë marrë asnjë mbështetje tjetër qoftë në mjete agregate apo kompensim kur prodhimi ju është dëmtuar.

Bilbil Kryemadhi thotë se prej 30 vitesh kanë punuar familjarisht, ndërsa edhe fëmijët janë angazhuar në fermë e nuk kanë marrë rrugët e emigrimit si shumë të rinj të tjerë shqiptar. Duke qenë të angazhuar të gjithë, Bilbili tregon se kanë arritur të ndërtojnë edhe një dhomë frigoriferike për të ruajtur prodhimet.

Nga ana tjetër, fermeri Bilbil Kryemadhi ju bën apel të rinjëve që janë emigrim të rikthehen në vendin e tyre.

Firma e cila ka ndërtuar rrugon e Arbrit ka ndërtuar edhe rrugën lidhëse nga Ura e fshatit Fshat deri tek rreth-rrotullimi. Por një dëmtim i ndodhur në afërsi të rrugës nacionale Qaf Buall – Klos një vit e gjysëm më parë nuk është rregulluar ende. Shirat e mëdha mbushën tombinon e rrugës duke bërë çarje të asfaltit. Që prej dëmtimit, ajo është mbushur me zhavor por nuk është riasfaltuar. Drejtuesit e mjeteve që përdorin çdo ditë këtë aks rrugor thonë se është turp të lihet në këtë gjendje rruga pasi nuk ka ndonjë kosto të madhe për ta asfaltuar. Sipas tyre, kompania mund të kishte rregulluar gjatë kohës që po asfaltonte pjesën e mbetur të rrugës së Arbrit por nuk e ka bërë. Ata shpresojnë që të shtrohet edhe kjo pjesë rruge pasi është e pakuptimtë që të vazhdojë të jetë kështu.

Dëmtimi i kësaj pjese rruge ka ndodhur gjatë shirave të rrëmbyeshëm të Nëntorit të vitit 2023, por që atëherë, vetëm është hedhur zhavor e nuk është marrë asnjë masë tjetër.

Niveli i ujit në liqenin e Ulzës ka rënë thuajse në pikën minimale ditët e fundit. Shkak dyshohet të jetë bërë prodhimi energjisë me kapacitete maksimale nga ana e kompanisë KURUM që ka privatizuar dy veprat hidroenergjitike, HEC-et Ulëz e Shkopet.

Ndonëse jemi ende në muajin e parë të pranverës, për specialistët e peshkimit ky shfrytëzim maksimal në këtë periudhë nuk është efektiv pasi mund të mos ketë reshje shirash që të bëjnë mbushjen e basenit me ujë në periudhën e shtimit natyral të peshkut liqenor.

Burime brenda HEC-it Ulëz thanë për Mat Televizion se shkak i shfrytëzimit në maksimum të ujit për prodhimin e energjisë elektrike ka qenë çmimi i lartë në tregun ndërkombëtarë.

Duke qenë se kompania e shet energjinë në bursën ndërkombëtare ka shfrytëzuar rritjen e çmimit të energjisë në treg dhe e ka shitur.

Sipas specialistëve, kjo ndikon negativisht në ekonominë nën ujore të peshkimit, pasi një nivel i tillë nuk i jep mundësinë peshkut të lëshojë vezët që të shumohet, pasi për këtë duhet që niveli i ujit të jetë deri në fshatin Urakë ku dhe ka bimësi.

Banorët dhe peshkatarët i bëjnë apel kompanisë që të ndalojë prodhimin e energjisë në mënyrë që të rritet niveli i ujit për t’i dhënë mundësi peshkut të bëjë shtim natyral.

 Si mbrëmjen e së hënës edhe gjatë natës së të martës pritet që termometri të zbresë disa gradë nën zero. Në orët e para të së martës pati sërish reshje bore deri 900 metra mbi nivelin duke bërë që shumë fshatra në të gjithë Qarkun Dibër të zbardhen nga bora. Fshatrat e Bulqizës dhe Dibrës patën më shumë prezencë reshjesh deri rreth orës 10:00 të paradites. Por rënia e temperaturave gjatë natës për fermerët është problem shqetësues si rezultat i krijimit të ngricave. Banorët e këtyre fshatrave shprehen se nëse do të ketë prani të ngricave atëherë shumë kultura bujqësore do të kenë shumë pak ose aspak prodhim edhe për këtë sezon.

Nga ana tjetër, fermerët shpresojnë që kushtet atmosferike të mos kenë luhatje ekstreme të temperaturave në ditët në vijim për shkak se dëmet mund të jenë akoma edhe më të mëdha.