Liqeni i Ulzës po pasurohet çdo vit me rasat peshku nga bashkëpunimi mes Bashkisë së Matit dhe Kompanisë që ka privatizuar hidrocentralet Ulëz e Shkopet.

Këtë të enjte është hedhur në basenin e liqenit të Ulzës një sasi prej 40 mijë copë rasat peshku të llojeve ballgjan, omur e krap.

Kryetari i Bashkisë Mat, Agron Malaj tha se pasurimi i liqenit të Ulzës dhe të Shkopetit me mijëra copë rasat çdo vit, ka rritur ekonominë nënujore dhe ju shërben të gjithë grupeve të peshkatarëve në zonë. Malaj garantoi se ky proces mbarështimi i faunës ujore të liqeneve Ulëz e Shkopet do të jetë i përvitshëm.

Ndërsa Drejtori i Hidrocentraleve Ulëz e Shkopet, Erin Ndreca, tha në fjalën e tij se bashkëpunimi me pushtetin vendor është në të mirë të komunitetit.

Ekonomia ujore e liqeneve Ulëz e Shkopet është rritur ndjeshëm vitet e fundit qoftë nga hedhja e rasatit të përvitshëm të peshkut, qoftë edhe nga shtimi natyral i tij.

Poeti matjan Basir Bushkashi, tashmë një penë e afirmuar në sferën e letërsisë shqipe, më 1 mars festoi ditëlindjen e 72 të tij, dhe e ka bërë traditë që me këtë rast lexuesve të shumtë të tij tu bëjë dhuratë një vëllim të ri poetik. Ai befason këtë herë me librin e 19 të tij, “Përditë shoh malet…”, një titull ky që bart një domethënie të thellë simbolike dhe filozofike.

Pena bushkashiane në këtë libër të ri me poezi, “Përditë shoh malet…” , një kopje të të cilët e ka përcjellë me shumë konsideratë pranë “Mat Televizion”, dëshmon edhe njëherë se muza artistike e Basir Bushkashit nuk njeh as moshë, as lodhje. Poezitë e tij vijojnë të jetë në linjën e muzës origjinale, përgjithësisht të shkurtra, por mesazhpërcjellëse të fuqishme, të ndërtuara bukur artistikisht, e që di të rrëmbejë zemrat e mendjet e lexuesve të një shkalle të gjerë.

Bushkashi nuk resht së shkruari edhe në këtë libër për përmallimin e lumit, kumbullën e bardhë, brengat e jetës, madhështitë e rreme, fjalët, zemërimit të yjeve, ziliqarit të fshehur, dashurive të vona, poetët që për këta të fundit thotë se “…kur marrin përpara gotën / kujtojnë se në dorë e kanë gjithë botën…”.

Poeti Basir Bushkashi, i cilësuar nga kritika si poeti i aromave të shpirtit, një poet liriko-filozofik ku me vargjet e tij çmon mbi të gjitha Njeriun, edhe në librin “Përditë shoh malet…” , shkruan për njerëz të tillë si Pjetër Budi, Havzi Nelaj, Dëshira Bushkashi, nënën e Tij Teje, motrën Nade, Xhevat Beqaraj, Nikolla Spathari, Jorgo Papingji, Amadeo Baçi, Agim Bajrami, Ali Muça, Josif Sadiku, Xhevahir Spahiu, etj., duke na bindur se në poezinë e tij, nuk kufizohet vetëm në përshkrime estetike, por ka për mision të ndriçojë thellësitë shpirtërore të individit. 

Libri mbyllet me recensionin e poetit dhe studiuesit Mevlud Buci mbi vëllimin e parafundëm poetik  të Bushkashit “Kumbimet e vona” që e konsideron një libër meritor poetik.

Ashtu si dhe për një seri librash të fundëm të Bushkashit edhe  për librin e ri, “Përditë shoh malet…”, vijojnë të kontribuojnë për kurimin e botimeve letrare të tij; redaktori Kujtim Stana, recensenti Gegë Tusha, dhe Kopertina Artan Kurti.

  Pak ditë më parë gjatë një inspektimi në tunelin e Murrizit, Ministrja e Infrastrukturës dhe Energjisë Belinda Balluku njoftoi se tuneli i Murrizit, një ndër veprat më të rëndësishme të rrugës së Arbrit do të hapet për qarkullimin e automjeteve me datë 14 Mars. Ndërkohë, Prefekti i Qarkut Dibër, Nexhbedin Shehu thotë se në të njëjtën ditë do të përfundojë edhe loti i tretë i rrugës së Arbrit nga fshati Herebel deri në qytetin e Peshkopisë. Shehu shtoi se me përfundimin e këtyre dy veprave të fundit të rrugës së Arbrit, banorët e Dibrës por jo vetëm, do të shkurtojnë distancën me Tiranën.

Aktualisht në tunelin e Murrizit po bëhen punimet e fundit si vendosja e ndriçimit dhe sinjalistikës, asaj horizontale dhe vertikale.

Dy familje kanë mbetur në qiell të hapur pasi banesat e tyre që ndodheshin në të njëjtën çati u përfshinë nga flakët mbrëmjen e kaluar.

Ngjarja ndodhi në fshatin Fushë Bulqizë, ku sipas familjarëve zjarri është shkaktuar nga një shkëndijë elektrike rreth orën 19:00. Në momentin e zjarrit, në banesë nuk ka patur njeri ndërsa familjarët janë njoftuar nga fqinjët. Latif Doga shprehet se zjarri ka nisur nga një shkëndijë elektrike në katin e dytë të banesës. Ai thotë se asgjë nuk ka shpëtuar pa u djegur, ndërsa ka mbetur në mëshirë të fatit dhe do të jetojë në rrënojat e mbetura nga zjarri. Ai i bën apel institucioneve që ta mbështesin dhe të dalë përgjegjësia e shkatimit të zjarrit.

Edhe banesa e Elidon Dogës është shkrumbuar e gjitha nga flakët. Vetë ai shprehet se 6 anëtarët e të dyja familjeve kanë mbetur në qiell të hapur dhe se nuk kanë ku të jetojnë. Ashtu si Latifi, edhe Elidon bën apel për ndihmë në këto momente të vështira me të cilat po përballet familja e tij.

Ndërkohë, djegies nga zjarri nuk i ka shpëtuar asgjë edhe pse aty ka mbërritur mjeti zjarrfikës. Për të llogaritur dëmet e shkaktuara pranë familjeve Doga kanë shkuar specialistët e Mbrojtjes Civile të Bashkisë Bulqizë, ku pritet të hartojnë raportin ekonomik në ditët në vijim

Bashkia e Bulqizës vijon të mos ketë një venddepozitim të mbetjeve inerte që dalin nga ndërtimet apo rikonstruksionet e objekteve të ndryshme në territorin e saj. Situata më kritike mbetet në fshatin Gjoricë e Poshtme, ku shtrati i zallit të Bulqizës vijon të mbushet me inerte që nuk dihet ende se nga kush janë hedhur.

Fakti që kjo zonë vijon të ndotet tregon qartë se institucioni vendor përgjegjës për ruajtjen e territorit nuk vepron. Grumbujt me inerte të ndryshme sa vijnë e shtohen, ndërsa nuk ka asnjë masë për largimin e tyre, apo gjetjen e fajtorëve.

Siç duket nga pamjet, shumë prej grumbujve të inerteve janë krijuar kohët e fundit edhe pse ky shqetësim është ngritur disa herë nga banorët e zonës në media.

Ndotësit shfrytëzojnë rrugën e Arbrit e cila kalon fare pranë shtratit të zallit të Bulqizës për të hedhur ndoshta në fshehtësi mbetjet që i prodhojnë nga rikonstruksionet e objekteve të ndryshme.

Por fakti se ato depozitohen në fshehtësi qoftë edhe natën, nuk do të thotë se nuk mund të pikasen nga institionet vendore apo ata qëndrore në nivel vendor që kanë në fokus të veprimtarisë së tyre edhe mbrojtjen e mjedisit.