Ekipi i futbollit, Burreli, ka arritur një tjetër fitore të rëndësishme në kampionat këtë të mërkurë në transfertën e luajtur në fushën “Plug Lushnje” ku mundi ekipin vendas të Lushnjës me rezultatin 3 me 1. Ndeshja ka nisur me vrull nga të dyja skuadrat të cilat kërkuan me ngulm golin e avantazhit, por janë vendësit që gjejnë rrjetën e portës matjen të parët. Hida kalon ekipin e tij në avantazh në minutën e 34 ndërsa skuadra e drejtuar nga tekniku Ditmar Bicaj nuk arriti të shënojë për plot 70 minuta.
Në këtë moment është Francino që barazon shifrat dhe i jep ekipit të tij moral për të vazhduar në kërkim të golit të fitores. Do të jetë Farruku që me dopjetën e tij në minutat 81 e 90-të që do të vulosë rezultatin final të takimit Lushnja 1 e Burreli 3. Me këtë fitore Burreli thellon diferencën e pikëve me Lushnjën nga 4 në 7 pikë për vendin e katërt në tabelën e renditjes.
Të gjitha takimet e javës së 26 janë luajtur këtë të mërkurë dhe përfuduan me rezultatet Pogradeci – Erzeni 3 me 0, Kastrioti – Besa 2 me 3, Apolonia – Flamurtari 1 me 2, Korabi – Vora 0 me 1 dhe Kukësi – Valbona 3 me 0.
Ndeshjet e javës së 27 janë parashikuar nga Federata Shqiptare e Futbollit që të luhen të gjitha ditën e diel me 9 Mars, ku Burreli do të presë në stadiumin “Liri Ballabani” ekipin e Pogradecit.