Të dielën e 9 Marsit do të luhen të gjitha ndeshjet e javës së 27 të kampionatit të kategorisë së parë në futboll. Burreli do të presë në orën 14:00, në stadiumin “Liri Ballabani”, ekipin e Pogradecit i cili gjendet një vend më poshtë se ekipi i Lushnjës dhe me 37 pikë të grumbulluara në 26 javë kampionat. Diferenca me skuadrën matjane është vetëm 7 pikë po aq sa Lushnja e kjo e bën përballjen të vështirë.
Megjithatë, futbollistët e Burrelit, të drejtuar nga tekniku Ditmar Bicaj, synojnë të marrin pikët e plota edhe në këtë ndeshje për të vijuar të mbajnë vendin e katërt të klasifikimit. Pas fitores në mesjavë ndaj Lushnjës, Burreli është gati të marrë tri pikët edhe në këtë përballje.
Skuadra matjane ka marrë udhëzimet e fundit këtë të shtunë, teksa i është kërkuar që të mos bëjë asnjë gabim në fushën e gjelbër dhe të vlerësojë maksimalisht skuadrën kundërshtare. Gjithsesi mbetet për tu parë rezultati i këtij takimi pas përfundimit të 90-të minutave lojë që do të zhvillohet të dielën në stadiumin e qytetit të Burrelit.
Përballjet e tjera të kësaj jave janë: Besa – Lushnja, Vora – Apolonia, Flamurtari – Kastrioti, Valbona – Korabi dhe Erzeni – Kukësi.
