Ndotja mjedisore, bashkia Klos nis monitorimin në terren për të kapur në flagrancë abuzuesit me mjedisin
Bashkia Klos është në “alarm” nga ndotja mjedisore që po shkaktohet në territorin e saj. Zona më problematike mbetet ajo në kufi me Bulqizën, ku ka ndotje të madhe si pasojë e hedhjes pa kriter të mbeturinave të ndryshme. Vetëm një ditë më parë, “Mat Televizion” denoncoi shtimin e pirgut të mbeturinave në vendin e quajtur “Dushku i kuq” në fshatin Kloskatund. Rënia e trafikut të lëvizjes së automjeteve në rrugën e vjetër Qaf Buall – Klos ka favorizuar personat e papërgjegjshëm për hedhjen e mbeturinave këtu. Nisur nga situata e krijuar Bashkia Klos ka ngritur një task-forcë për monitorimin e territorit të saj nga ndotje të tilla. Përfaqësues të pushtetit vendot thanë se task-forca do të operojë në terren në të gjithë territorin, e sidomos në zonën më problematike që është fshati Plan i Bardhë dhe Kloskatund. Në këto dy fshatra dyshohet se ndotësit vijnë nga qyteti i Bulqizës, ku shmangin dërgimin e mbeturinave në vendin e përcaktuar dhe shfrytëzojnë këtë aks që ka pak lëvizje dhe i hedhin aty. Banorët kanë qenë dëshmitarë disa herë të konstatimit të furgonëve që ndalen në këtë zonë dhe hedhin mbeturina nga më të ndryshmet.
