Pritet të marrin fund vuajtjet e banorëve të zonës së Martaneshit sa i përket 16 kilometrave rrugë nga Qafa e Buallit deri në Krastë, e cila ishte kthyer në një gangrenë prej 34 vitesh.
Bashkimi i kompanive që kanë fituar zbatimin e projektit për sistemim – asfaltimin e kësaj rruge kanë nisur punën prej ditësh.
Zbatimi i projektit ka nisur nga Qafa e Buallit në drejtim të Krastës. Fillimisht po bëhet zgjerimi i trasesë ekzistuese për të vijuar më pas me proceset e tjera.
Ndërkohë, afati për të mbyllur punimet është 13 muaj që nga nënshkrimi i kontratës, ndërsa pritet të mbyllen më shpejt për shkak se rruga ka thuajse në të gjithë gjatësinë gjerësinë e nevojshme dhe bazament.
Aksi rrugor Qaf Buall – Krastë është në pronësi të Autoritetit Rrugor Shqiptar, ndërsa prej vitesh apeli i banorëve të Martaneshit ishte sistemimi dhe asfaltimi i kësaj rruge shumë të rëndësishme për ta.
Rruga në fjalë i shërben mijëra banorëve të Martaneshit si dhe shumë subjekteve minerare që operojnë në këtë zonë.