Në Dibër janë disa pika të ngritura për të marrë vaksinën antiCovid. Një ndër ta është edhe në Maqellarë, ku banorët e kësaj njësie por edhe të njësive të tjera kanë mundësinë të vaksinohen. Kryevaksinatorja pranë kësaj qendre, Edlira Jashari tha se vetëm në këtë qendër janë vaksinuar më shumë se 2 mijë banorë. Gjithashtu, po në qendrën e vaksinimit në Maqellarë janë vaksinuar i gjithë personeli që punon në doganën e Bllatës. Jashari u shpreh se për shkak se është zonë kufitare, kontaktet e banorëve të dy vendeve kanë qenë të shpeshta, çka ka bërë që rrisku të jetë i lartë për tu infektuar. Kryevaksinatorja Edlira Jashari u bëri edhe njëherë apel të gjithë banorëve të Maqellarës që janë mbi 18 vjeç të paraqiten për tu vaksinuar, pasi vetëm në këtë mënyrë mund të mbrohet vetja dhe të tjerët.
Në të gjithë Bashkinë e Dibrës sipas Njësisë Vendore të Kujdesit Shëndetësor, janë vaksinuar mbi 27 mijë persona me dozën e parë dhe të dytë.
