KLOS, QYTETARËT NË PROTESTË KUNDËR SHKRIRJES SË BASHKISË

Një tubim qytetar u organizua pasditen e 31 korrikut në qendër të qytetit të Klosit për të kundërshtuar projektin e ri të reformës administrativo-territoriale, i cili parashikon shkrirjen e Bashkisë Klos dhe bashkimin e saj me Bashkinë Mat. Në protestë morën pjesë banorë, punonjës të administratës së Bashkisë Klos dhe ish-drejtues vendorë, të cilët kërkuan ruajtjen e Klosit si bashki më vete. Kundërshtimi i këtij projekti kishte nisur që në orët e paradites, kur administrata e Bashkisë Klos bojkotoi punën për disa orë në shenjë proteste ndaj ndryshimeve të propozuara nga mazhoranca socialiste. Gjatë tubimit, pjesëmarrësit theksuan se protesta nuk kishte karakter politik, por synonte mbrojtjen e identitetit dhe funksionimit të njësisë vendore. Sipas tyre, Bashkia Klos ka potencial të mjaftueshëm ekonomik për të vazhduar të funksionojë si njësi më vete, falë ndikimit të Rrugës së Arbrit, zhvillimit të turizmit, burimeve natyrore, hidrocentraleve, aktivitetit minerar dhe bizneseve që operojnë në zonë. ……….. Protestuesit shprehën gjithashtu shqetësimin se bashkimi me Bashkinë Mat do të rrisë distancën për marrjen e shërbimeve publike në Burrel, duke sjellë kosto shtesë për qytetarët. Ata paralajmëruan se largimi i institucioneve vendore mund të ndikojë negativisht në ekonominë lokale dhe të përshpejtojë largimin e banorëve nga zona. Protesta në Klos vjen pas depozitimit në Kuvend të projektligjit për reformën e re administrativo-territoriale nga Partia Socialiste. Sipas draftit, Qarku Dibër do të kalojë nga katër bashki aktuale në tre: Dibër, Bulqizë dhe Mat, ndërsa Klosi do të ruajë statusin e qytetit, por jo atë të bashkisë më vete. Projektligji pritet të shqyrtohet në vijim në Kuvend, ndërsa përfaqësues të komunitetit kanë paralajmëruar se kundërshtimi ndaj këtij projekti do të vijojë edhe me forma të tjera organizimi.