Shumë familje në prag të natës së ndërrimit të viteve planifikojnë t’i mbushin tryezat plot apo ta kalojnë në restorante, por ka edhe nga ata të cilat jo vetëm nuk bëjnë planifikime, por shpresojnë të kenë bukë për të ngrënë. E tillë është edhe familja e Hamit Likës në lagjen “Minatori” të Bulqizës.
Familja prej 6 anëtarësh jeton në kushtet esktreme të varfërisë ku dhe bukën e thatë e marrin me listë në dyqane. Në këtë familje janë tre anëtarë me aftësi të kufizuara, kryefamiljari Hamiti, nëna Fatmira dhe bashkëshortja Bedrija e të cilët e kanë krejtësisht të pamundur të punojnë. E zonja e shtëpisë Bedrija thotë se jetesa e tyre është në kufijt e mbijetesës pasi nuk kanë shtëpi e nuk kanë të ardhura të mjaftueshme për të jetuar. Lekët që marrin nga pensioni i invaliditetit shkojnë për ilaçe, energji elektrike e ujë. Apeli i Bedrijes shkon për të gjitha instancat shtetërore e jo shtetërore që tju sigurojnë një banesë, në mënyrë që fëmijët të mos sëmuren.
Për natën e ndërrimit të viteve, çifti Bedrije e Hamit Lika thonë se jo vetëm nuk do të kenë mundësi për dhurata për fëmijët e tyre, por nuk mund tju sigurojnë as kafshatën e bukës thatë. Hamiti tregon se në shtëpi kanë mbetur vetëm pak gramë vaj, sheqer, oriz e kripë.
6 anëtarët e familjes Lika në lagjen “Minatori” të Bulqizës janë me sytë nga të gjithë për t’i ndihmuar duke u shtrirë dorën e solidaritetit.
