Është zbardhur dhe dokumentuar me fakte ligjore vjedhja e 1.4 milion lekëve të rinj, në Tiranë.

Sipas njoftimit të Policisë, është mësuar se një shtetas 36-vjeçar nga Tirana i njohur si Lefter Dauti, dhe e dashura e tij dibrane, shtetasj Qamile Hakorja 26-vjeçe kanë organizuar grabitjen e parave nga shtetasja me inicialet K. Gj., e cila me një valixhe me para udhëtonte nga Peshkopia në drejtim të Tiranës.

Shtetasja Qamile Hakorja, ka udhëtuar në të njëjtin furgon e shtetasen që posedonte paratë, dhe në momentin që ka zbritur në Tiranë ka marrë valixhen e parave me pretendimin se ishte e saja.

Në përfundim të hetimeve Policia sekuestroi në cilësinë e provës materiale 1.400.000 lekë të rinj, 2770 euro, 340 paund dhe disa bizhuteri floriri.

Materialet hetimore për rastin në fjalë i kaluan Prokurorisë së Rrethit Gjyqësor Tiranë.

Njoftimi i Policisë:

Tiranë

Zbardhet nga Komisariati i Policisë Nr. 4 dhe dokumentohet me prova ligjore, vjedhja e një shume të konsiderueshme parash dhe bizhuterish floriri.

Shpallen në kërkim dy autorët e vjedhjes.

Sekuestrohen 1.400.000 lekë të rinj, 2770 euro, 340 paund dhe bizhuteri floriri.

Shërbimet e Komisariatit të Policisë Nr. 4, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, bazuar në provat ligjore të grumbulluara, bënë shpalljen në kërkim të shtetasve:

– L. D., 36 vjeç banues në Tiranë, dhe Q. H., 26 vjeçe, banuese në Peshkopi, Dibër.

36-vjeçari, pasi ka marrë informacion se kushërira e tij, shtetasja K. Gj., do të udhëtonte nga Peshkopia në drejtim të Tiranës, me një valixhe me para, në bashkëpunim me të dashurën e tij, shtetasen Q. H., ka organizuar vjedhjen e valixhes.

Shtetasja Q. H. është paraqitur si udhëtare në linjën e furgonit me të cilin do të udhëtonte shtetasja K. Gj. dhe pasi ka udhëtuar disa orë, ka zbritur në Tiranë, duke marrë edhe valixhen, me pretendimin se ishte e saj.

Në cilësinë e provës materiale u sekuestruan 1.400.000 lekë të rinj, 2770 euro, 340 paund dhe disa bizhuteri floriri.

Materialet i kaluan Prokurorisë së Rrethit Gjyqësor Tiranë, për veprime të metejshme procedurale, për veprën penale “Vjedhja”, kryer në bashkëpunim.