Banesa monument kulture që po rrezikon jetë njerëzish

Janë me dhjetra ndërtesa në vendin tonë që mbajnë statusin “Monument Kulture të Kategorisë së Parë”. Ata e kanë marrë këtë status kryesisht paraviteve 90-të, por që e mbajnë edhe sot e kësaj dite. E tillë është edhe banesa “Kurti” në fshatin Shupenzë të Bulqizës. Kjo banesë u shpall “Monument Kulture e Kategorisë së Parë” në 8 Janar të vitit 1977, nga Ministria e Arsimit dhe Kulturës e asaj kohe. Ajo ka një arkitekturë tipike të zonës së Dibrës, e ndërtuar kryesisht me gurë, qerpiç, dhe elementë druri. Nonëse mban këtë status të veçantë dhe është në listën e objekteve të trashëgimisë kulturore të vendit tonë, kujdesi ndaj saj duket që është “zero”. Banesa jo vetëm që nuk është mbajtur në gjendje të rregullt, por ajo rrezikon edhe jetën e banorëve që kalojnë poshtë saj. Familja e Shefik Kurtit e ka të pamundur restaurimin, ndërsa Ministria e Kulturës, Turizmit dhe Sportit nuk ka bërë asnjë ndërhyrje. Banorët kërkojnë ndërhyrje të menjëhershme. Zona e Bulqizës ka disa objekte të tilla që mbajnë statusin “Monument Kulture”, por kujdesi për ta mbajtur gjallë kujtesën thuajse mungon. Si mungesë e mirëmbajtjes, një banesë e tillë, në fshatin Sopot të Bulqizës, u shemb e gjitha një vit më parë.