Tirana dhe Helsinki, Ura e Re Ajrore me Finnair: Shqipëria Lidhet me Evropën Veriore dhe Azinë
Tiranë, 30 Prill 2026 – Aeroporti Ndërkombëtar i Tiranës (TIA) shënon një hap të rëndësishëm në zgjerimin e lidhjeve ajrore, duke mirëpritur fillimin e operacioneve të Finnair, linja ajrore kombëtare e Finlandës. Tashmë, Tirana do të lidhet drejtpërdrejt me Helsinkin me dy fluturime në javë, çdo të enjte dhe të diel.
Ky destinacion i ri jo vetëm që forcon ndjeshëm lidhjet e Shqipërisë me Evropën Veriore, por gjithashtu ofron një portë të re hyrjeje në rrjetin e gjerë të Finnair drejt Azisë dhe destinacioneve kryesore globale, falë pozicionit strategjik të Aeroportit të Helsinkit si një hub i shpejtë dhe konkurrues midis Evropës dhe Azisë.
Hyrja e Finnair në tregun shqiptar pritet të tërheqë një gamë të larmishme pasagjerësh. Këtu përfshihen turistë të interesuar për të eksploruar Shqipërinë si një destinacion në zhvillim, udhëtarë biznesi që kërkojnë lidhje efikase, si dhe pasagjerë tranzit që përfitojnë nga rrjeti i fuqishëm ndërkontinental i Finnair. Njëkohësisht, kjo linjë u ofron shqiptarëve akses të lehtë drejt Finlandës dhe lidhje të përshtatshme drejt qendrave kryesore në Evropën Veriore dhe Azi.
Fluturimi inaugurues u prit me një ceremoni speciale në Aeroportin Ndërkombëtar të Tiranës. Përfaqësues nga TIA dhe Finnair ishin të pranishëm për të mirëpritur avionin me një përshëndetje tradicionale me ujë dhe aktivitete për pasagjerët.
Manjola Kaso, Drejtoreshë e Zhvillimit të Biznesit të Aviacionit në Aeroportin Ndërkombëtar të Tiranës, theksoi rëndësinë e kësaj linje. "Sot mirëpresim Finnair në Aeroportin Ndërkombëtar të Tiranës dhe shënojmë hapjen e linjës së re direkte drejt Helsinkit. Kjo linjë përfaqëson një destinacion të rëndësishëm në rrjetin tonë, duke forcuar më shumë lidhjet mes Shqipërisë dhe Evropës Veriore. Helsinki është një hub i rëndësishëm dhe përmes rrjetit të Finnair, kjo linjë do t’u ofrojë pasagjerëve tanë mundësi të zgjeruara udhëtimi jo vetëm drejt Finlandës, por edhe drejt destinacioneve kryesore në Azi. Presim me padurim të ndërtojmë një partneritet të fortë me Finnair dhe të zhvillojmë më tej këtë treg premtues," u shpreh ajo.
Nga ana e Finnair, Adam Marciniec, Menaxher Rajonal për Europën Qendrore dhe Lindore, shprehu entuziazmin e kompanisë. "Jemi të lumtur të hapim këtë linjë të re drejt Tiranës, duke krijuar mundësi të reja si për pasagjerët turistikë ashtu edhe për ata të biznesit. Shqipëria është një treg i ri për Finnair dhe ky destinacion forcon praninë tonë në Ballkan, ndërkohë që u ofron pasagjerëve shqiptarë akses të lehtë drejt hub-it tonë në Helsinki dhe më tej në rrjetin tonë në vendet nordike, baltike dhe Azi," tha Marciniec.
Finnair, anëtare e aleancës Oneworld dhe e njohur si Linja Ajrore më e Mirë në Evropën Veriore për 15 vite radhazi në çmimet Skytrax, specializohet në lidhjen e trafikut të pasagjerëve dhe mallrave midis Azisë, Amerikës së Veriut dhe Evropës. Ndërkohë, Aeroporti Ndërkombëtar i Tiranës, si porta kryesore e Shqipërisë, vazhdon të përjetojë rritje të fortë, duke zgjeruar rrjetin e destinacioneve dhe partneriteteve me linjat ajrore, si dhe duke investuar në infrastrukturë dhe teknologji për një përvojë më të mirë të pasagjerëve.
