Skandal në Akademinë e Sigurisë: 64 Kursantë të Helmuar, Reagimi i Sallës Ngre Pikëpyetje
64 kursantë të Akademisë së Sigurisë janë helmuar, duke shkaktuar shqetësim dhe reagime të forta në opinionin publik. Andis Salla, drejtor i kësaj akademie, ka reaguar publikisht, por deklaratat e tij kanë ngritur pikëpyetje rreth seriozitetit të trajtimit të situatës.
Salla u përpoq të mbronte kompaninë furnizuese, duke theksuar se në rastin e parë të helmimit, analizat nuk e kishin lidhur problematikën direkt me ushqimin, por me mungesën e higjienës. Për incidentin e dytë, ai kërkoi durim, duke pritur rezultatet e analizave të reja për të përcaktuar shkakun dhe masat parandaluese.
Kjo qasje ka bërë që disa të interpretojnë se Salla i sheh studentët e Akademisë si "kavje laboratori".
Ai deklaroi: “Në helmimin e parë nuk rezultoi helmim nga ushqimet, por problematika lidhej me higjienën. Do të presim rezultatet e analizave që pritet të dalin sot për të përcaktuar shkakun e këtij rasti dhe për të identifikuar problematikën që duhet parandaluar përmes Autoritetit Kombëtar të Ushqimit.”
Shpresohet që këtë herë, Autoriteti Kombëtar i Ushqimit (AKU), i drejtuar nga Blerina Gjylameti, dhe institucionet në varësi, të arrijnë të gjejnë shkakun e vërtetë të helmimit. Është thelbësore të shmangen raste të tjera të ngjashme, pasi bëhet fjalë për shëndetin dhe jetën e njerëzve, jo thjesht për numra në statistika.
