Protesta e Shtatë Kombëtare: Sytë Drejt Qeverisë, Kërkohet Dorëheqja e Ramës

Opozita zhvillon sot protestën e shtatë kombëtare, duke kërkuar dorëheqjen e qeverisë dhe të kryeministrit Edi Rama. Kjo vjen pas akuzave se ish-zëvendësja e tij, Belinda Balluku, rezultoi e përfshirë në afera korruptive, ndërsa kërkesa e SPAK për arrestimin e saj u hodh poshtë nga shumica parlamentare.

Tubimi do të nisë në orën 19:00 para Kryeministrisë dhe pritet të mbyllet në orën 22:00. Organizatorët kanë njoftuar se skenari do të rikthejë formatin e fjalimeve. Drejtues të Partisë Demokratike, përfaqësues të forumit rinor, partive aleate dhe aktivistë do të mbajnë fjalimet e tyre nga një podium i vendosur përpara godinës së Kryeministrisë, duke u shmangur marshimit nëpër Tiranë.

Gjatë tubimeve të kaluara, podiumi mungoi dhe skenari u fokusua te marshimi, shpesh i shoqëruar me hedhjen e molotovëve dhe fishekzjarreve drejt institucioneve qeveritare. Megjithatë, nuk përjashtohet që protesta e sotme të marrë edhe zhvillime të tjera gjatë mbrëmjes.

Policia e Shtetit ka njoftuar masat e sigurisë në lidhje me protestën. Për shkak të tubimit, do të ketë kufizime në lëvizjen e automjeteve në disa akse rrugore. Konkretisht:

• Nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga “Ura e Dajtit” deri në rrugën “Ismail Qemali”.
• Nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia e Tiranës apelon për organizatorët e tubimit që të respektojnë afatin kohor dhe vendin e zhvillimit të protestës, si dhe kërkon mirëkuptimin e qytetarëve për kufizimin e lëvizjes. Gjithashtu, apelon që qytetarët të distancohen në rast se gjenden përballë veprimeve të kundërligjshme që cenojnë rendin dhe sigurinë publike.