Pak ditë pasi protestuan për shkelje të kontratës së punës metalurgët e uzinës së Ferrokromit në Komsi të Matit, të njëjtën gjë kanë bërë edhe minatorët e minierës më të madhe në Bulqizë, e cila administrohet nga kompania turke Yıdırım Holding.

Shkak i kësaj proteste të kësaj të hëne ka qenë pasi minatorëve të Bulqizës u është komunikuar se në muajt në vazhdim do të tu shtohet puna edhe të shtunave, por jo vetëm. Ata pretendojnë se nuk është zbatuar kontrata për rritjen e pagave, gjë kjo që ka qenë në kontratë prej fillimit të janarit si dhe nuk është dhënë 4% i inflacionit të akorduar nga shteti.

Minatorët e Bulqizës nuk janë lejuar të protestojnë në afërsi apo brenda ambjenteve të minierës, ndaj zgjodhën të bojkotojnë punën këtë të hënë.

Nuk dihet nëse rezistenca e minatorëve të minierës më të madhe në vendin tonë do të vijojë apo kompania do të plotësojë kërkesat e tyre. Megjithatë, kjo është hera e parë, pas shumë vitesh, që minatorët, që punojnë në galerinë e kromit më të madhe në Bulqizë, të ngrejnë zërin për të drejtat e tyre. Pak vite më parë një sindikatë, e krijuar nga minatorët që punonin aty, u shkri, pasi drejtuesit e saj u larguan nga puna.

Erik dhe Sana janë 36 dhe 32 vjeç vijnë nga Holanda bashkë me dy fëmijët e tyre të vegjël. Ata kanë nisur një udhëtim i cili do të zgjasë më shumë se një vit dhe këtë nuk e kanë bërë duke qëndruar nëpër hotele, por në një kamper në të cilin kanë kushtet e nevojshme për të qëndruar. Pas qëndrimit në disa shtete si në Greqi, Turqi, Rumani ata janë ndaluar së fundmi në Shqipëri.Erik thotë se gjatë qëndrimit në Shqipëri kanë vizituar disa qytete dhe janë befasuar nga çdo gjë. Ata po vizitojnë Matin ku janë ndalur në qytetin e Burrelit, teksa vlerësojnë mikpritjen matjane.

 “Dimrin duhej ta kalonim diku, dhe vendosëm ta kalojmë në Turqi, Greqi, ballkanin sepse temperaturat janë të larta, ka diell në dimër. Pas greqisë ne po qëndrojmë në ballkan për të parë disa vende. Ne vendosëm të vinim në Shqipëri pasi kemi një mik të ngushtë atje në hollandë. Miku jonë i dashur e ka emrin Soni. Ne menduam që ta vizitonim shtetin e tij dhe kemi dëgjuar shumë histori të bukura. Kemi qenë në Përmet, Gjirokastër, Ksamil, Durrës. Njerëzit këtu janë të dashur, miqësorë dhe donim të kalonim kohë të mirë. Është shumë bukur të shikosh dhe të jesh pjesë e saj. Tani jemi këtu në Burrel”.

Për 32-vjeçaren Sana, ky është një ndër udhëtimet që familja e saj do ta mbajë mend gjatë. Edhe pse në hapsirë shumë të vogël, Sana thotë se ka arritur që të ambjentohet me jetën në kamper. 32-vjeçarja shton se kjo e ka lidhur shumë ngushtë familjen.

 “Ne kemi nisur udhëtimin në muajin Gusht. Kemi lënë shtëpinë për një vit për të udhëtuar dhe për tu kënaqur mesa më shumë mundësi të jetë e mundur. Ne po eksplorojmë europën pasi është shumë bukur këtu. Kemi qëndruar për një kohë në Rumani, pastaj tre muaj në Turqi, në Greqi e tashmë në Shqipëri.

Bota është shumë e bukur dhe ne po e shohim atë me fëmijët tanë. Është bota e tyre dhe po e jetojnë edhe ata.

Është e vështirë të jesh me shumë njerëz në kamper pasi është shumë e ngushtë. Për 2 – 3 muajt e parë ishte jetë e vështirë por duhet të mësohesh të përshtatesh t’i bësh gjërat. Por kjo na ka lidhur shumë, saqë kur flasim me miqtë tanë, jut hemi që nuk jemi katër, por jemi një. Jemi lidhur aq shumë, sikur njëri të largohet ne e ndjejmë mungesën. Jam e lumtur që kjo është pjesë e jetës tonë tashmë”.

Pas qëndrimit në Burrel, udhëtimi i familjes nga Holanda do të vazhdojë edhe në disa shtete të tjera, deri në plotësimin e periudhës së planifikuar për pushime.

  8 Marsi është i njohur ndërkombëtarisht si Dita e Gruas, ku prej më shumë se një shekulli po festohet, ndryshe nga zanafilla e saj që ishte protestë për të drejtat e tyre. Por për 90-vjeçaren, Feride Elezi, nga fshati Strikçan i Bulqizës, 8 Marsi është një ditë e zakonshme, as festë e as protestë. E moshuara thotë se kurrë nuk e ka festuar 8 Marsin, ndërsa pjesën më të madhe të jetës e ka kaluar duke i shërbyer vajzës së saj e cila vuan nga nanizmi. Mes halleve e mundimeve të shumta, nënë Feridja shprehet se përballet me probleme ekonomike për shkak të të ardhurave të pakta. Ajo nuk di çfarë është 8 Marsi pasi nuk e ka festuar kurrë.

Fqinjët e Ferides tregojnë se e moshuara kujdeset për vajzën e sëmurë 40-vjeçare, ndërsa nuk e shohin të festojë ndonjëherë festa. Ata i bëjnë apel institucioneve që ta ndihmojnë familjen Elezi, nga fshati Strikçan i Bulqizës, e cila ka, më shumë se kushdo tjetër familje në zonë, nevojë për ndihmë.

Nëse pjesa më e madhe e grave në ditën e 8 Marsit festojnë, ka edhe raste që nuk arrijnë të festojnë, si nënë Feridja, e cila po sfidon hallet e jetës me shumë heroizëm.

  Ka përfunduar i gjithë procesi i regjistrimeve në diasporë pas shqyrtimit të kërkesave të fundit që ishin bërë me datë 4 Mars. Numri total i shqiptarëve të diasporës që janë regjistruar në platformën “PER” të Komisionit Qendror të Zgjedhjeve ka shkuar në 245,975 shtetas, të cilëve do t’ju shkojë fleta e votimit. Ndërkohë, janë 9,603 zgjedhës nga Qarku Dibër që jetojnë në vende të ndryshme të botës që duan të bëhen pjesë e procesit të votimeve për zgjedhjet parlamentare të 11 Majit në vendin tonë.

Po t’i referohemi të dhënave zyrtare nga Komisioni Qendror i Zgjedhjeve për parlamentaret e vitit 2021, qytetarë me të drejtë vote janë 131,225 shtetas ku 69,133 kanë votuar në zgjedhjet e fundit për pushtetin qendror.

Nëse do të qëndrojë numri i pjesmarrësve në votime për zgjedhjet e 11 Majit, atëherë për të zgjedhur 5 deputetët përfaqësues të Qarkut Dibër në parlamentin e ri do të votojnë 78,736 qytetarë. Por kjo mbetet për tu parë pasi një pjesë e qytetarëve të regjistruar në diasporë këtë vit, mund të kenë ardhur fizikisht për të votuar në zgjedhjet e 4 viteve më parë.

Me mbylljen e këtij procesi, pritet që partitë politike të depozitojnë listat me emrat e kandidatëve në Komisionin Qendor të Zgjedhjeve, ndërsa ky i fundit të nisë punën për prodhimin e fletës së votimit.