Një plagosje me armë zjarri është regjistruar mëngjesin e sotëm në fshatin Balldre të Lezhës.
I plagosur ka mbetur Hilë Gjini, 43 vjeç, teksa ka dalë nga shtëpia për të dërguar fëmijët në shkollë.
Ndërsa ka hipur në makinë rreth orës 08:00, Gjini është qëlluar me dy plumba në këmbë nga një armë automatik.
Personi i cili e ka qëlluar dyshohet të jetë një banor i zonës me iniciale Gj.Gj.
Gjatë kësaj kohe, i plagosuri ka qëndruar në makinë derisa ka mbërritur ambulanca dhe e ka dërguar në spitalin e Lezhës.
Nga informacionet paraprake nuk dihen shkaqet e kësaj ngarje ndërsa policia ka shkuar tek vendi ku ndodhi plagosja dhe po punon për kapjen e autorit.
Lezhë/Informacion paraprak
Në fshatin Balldre , Lezhë, pas një konflikti për motive ende të paqarta, shtetasi Gj.Gj.,ka plagosur me armë zjarri në këmbë shtetasin H.Gj.,43 vjeç, banues në fshatin Balldre, i cili është transportuar në spitalin Rajonal , Lezhë dhe ndodhet nën kujdesin e mjekëve, jashtë rrezikut për jetën.
Grupi hetimor ndodhet ne vendngjarje dhe po punon për zbardhjen e plotë të rrethanave të ngjarjes.
Shërbimet e Policisë të D.V.P Lezhë dhe të Komisariatit të Policisë Lezhë po krehin zonën si dhe janë ngritur pika kontrolli për kapjen e autorit.
