Gjykata e Dibrës nuk ka arritur të dalë me vendim as në seancën e sotme të zhvilluar ndaj dy të akuzuarve të dosjes 184 për shitjblerje të votave në zgjedhjet e pjesshme lokale të vitit 2016, Drini Gjeci e Nuri Meda.
Këta të fundit kanë kërkuar gjykim të shkurtuar, ndërsa prokuroria ka dhënë pretencën me nga 2.5 vite burg.
Të dy të akuzuarit u paraqitën në gjykatë rreth orës 13 e 30 minuta të kësaj të Enjteje, por munguan avokatët e tyre.
Në mungesë të mbrojtjes, është vendosur që seanca e radhës ndaj tyre të mbahet me datën 8 Shtator, duke qenë se muaji Gusht është muaj pushimesh.
Drini Gjeci me detyrë ish Drejtor i Drejtorisë Arsimore Dibër dhe Nuri Meda ish Administrator i Njësisë Administrative Tomin, akuzohen se kanë ndikuar tek zgjedhësit për të votuar kandidatin Muharrem Rama në zgjedhjet për Bashkinë e Dibrës në vitin 2016.
