Prej afro 10 ditësh mali i Tërnovës në njësinë administrative Zerqan në Bashkinë e Bulqizës është nën pushtetin e flakëve. Me gjithë ndërhyrjen e bërë nga toka ka qenë e pamundur që zjarri të shuhet plotësisht. Kjo ka bërë që zjarri të marrë përmasa të mëdha ndërsa autoritetet lokale vijojnë luftën me flakët nga toka. Në terren janë angazhuar punonjës të Shërbimit Zjarrfikës, të shërbimit pyjor, forcat e Armatosura dhe banorë të zonës. Ndërkohë autoritetet vijojnë të kërkojnë ndihmë për ndërhyrje nga ajri. Deri tani janë djegur dhjetra hektar me bredh, pishë dhe pemë Ahu. Kjo ka qenë zona më e paprekur në Bulqizë ndërsa me zjarrin e rënë, një nga perlat më të bukura të kurorës së liqenit të zi dëmtohet totalisht.
Ndërkohë një tjetër vatër zjarri është në malin e Qaf Shtamës ku po punohet nga toka për të shuar flakët, ndërsa zjarri ndihmohet nga era dhe temperaturat shumë të larta.
Një tjetër vatër zjarri shfaqet në Maqellarë, nis ndërhyrja nga
toka
Një vatër zjarri është aktivizuar në Parkun Natyror Korab-Koritnik, mbi fshatin Popinar, Njësia Administrative Maqellarë, Bashkia Dibër. Zjarri është pikasur mbrëmjen e djeshme në Pyll Ahu, dëllinje e shkurre, ku shumë pranë pyllit me Pishë janë përshkuar e djegur rreth 4 ha. Zjarri është drejt vënies nën kontroll. Për fikjen e zjarrit janë angazhuar rreth 80 forca nga Shërbimi zjarrfikës Peshkopi, ADZM- Dibër, Drejtorisë së Pyjeve të Bashkisë, Njësia Administrative Maqellarë, si dhe punonjës të sektorëve të ndryshëm të Bashkisë Dibër. Po punohet për izolimin e plotë të zjarrit por terreni shumë i vështirë dhe mbetjet e drunjve të prera ndër vite, bëhen pengesë pwr shuarjen e flakëve.
