Berisha: Protesta, Uragan Kundër Diktaturës së Ramës, Thirrje për Pjesëmarrje Masive
Kryetari i Partisë Demokratike, Sali Berisha, doli sot në një konferencë për mediat, ku shprehu mbështetjen e fuqishme të partisë për protestat masive që po zhvillohen në Tiranë. Ai e cilësoi lëvizjen qytetare si një “uragan të fuqishëm kundër diktaturës autoritare, regjimit të Edi Ramës, të bazuar në farsën zgjedhore, krimin, drogën dhe vjedhjen e shqiptarëve”.
Berisha bëri një thirrje të prerë për të gjithë demokratët, mbështetësit e Partisë Demokratike, si dhe çdo qytetar shqiptar, që t'i bashkohen protestës së rinisë dhe qytetarëve të Tiranës. Ai theksoi se kjo protestë “tejkalon fuqitë e forcave politike, por kërkon me vendosmëri fundin e regjimit autokratik të Edi Ramës dhe anulimin e një serie ligjesh, për të cilat deputetët e PD-së kanë votuar kundër në Parlament”.
Lideri i opozitës vuri në dukje rëndësinë ndërkombëtare të protestave, duke deklaruar se “është bërë lajm dhe superlajm i të gjitha agjencive më të mëdha të botës”.
Më tej, Berisha denoncoi ashpër qëndrimin e qeverisë. “Jam sot këtu për të denoncuar me forcën më të madhe qëndrimin e papërgjegjshëm, cinik e armiqësor të Edi Ramës dhe rrethit të tij ndaj protestës, kërkesave të protestuesve dhe paralajmëroj që me këtë qëndrim, ai kërkon ta zhysë vendin në kaos”, deklaroi ai.
Berisha kritikoi ashpër përpjekjet e Ramës për të organizuar “anti-mitingje anakronike”, të cilat ai i krahasoi me “takimet e zgërbonjave të krimit të PS, takime që ngjasojnë nga Alfa te Omega me takimet e mafies”. Ai i bëri thirrje kryeministrit të heqë dorë urgjentisht nga këto kundër-protesta, duke theksuar se “të mos sfidojë uraganin e fuqishëm paqësor të rinisë studentore me anti-mitingje mafioze”.
Në përfundim, Berisha dënoi “provokacionet e ulëta të Edi Ramës ndaj protestuesve, epitetet, fiksimet, halucinacionet e tij” dhe i bëri thirrje opinionit publik ndërkombëtar dhe politik të mbështesin këtë protestë, e cila ka si mision “shpëtimin e Shqipërisë nga narko-regjimi i Edi Ramës”.
