Austria Rikthen Emigrantët në Itali: Rritet Presioni mbi Romën me Rregullat e Reja Europiane
Austria ka nisur rikthimin në Itali të emigrantëve që kanë hyrë në Bashkimin Europian përmes territorit italian, në zbatim të rregullave të reja europiane për azilin dhe migracionin.
Që prej 12 qershorit, janë kryer katër transferime nga Austria drejt Italisë. Vjena i bashkohet kështu Gjermanisë dhe Zvicrës, të cilat kanë nisur gjithashtu rikthimin e azilkërkuesve për të cilët Italia konsiderohet vendi përgjegjës për shqyrtimin e kërkesës së azilit.
Bëhet fjalë për të ashtuquajturit “dublinantë”, emigrantë që pasi kanë hyrë ose janë regjistruar në Itali, kanë vazhduar udhëtimin drejt vendeve të tjera europiane. Sipas rregullave europiane, në raste të caktuara ata mund të transferohen përsëri në shtetin përgjegjës për procedurën e azilit.
Ky zhvillim vjen me hyrjen në zbatim të sistemit të ri europian për migracionin dhe azilin, që synon të përcaktojë më qartë përgjegjësitë e vendeve anëtare për emigrantët që mbërrijnë në territorin e BE-së.
Fakti që pas Gjermanisë dhe Zvicrës edhe Austria ka nisur transferimet, mund të shtojë presionin mbi Italinë, një nga vendet kryesore të hyrjes së emigrantëve në Europë përmes rrugës së Mesdheut.
