Rruga që lidh 12 fshatra të Bulqizës dhe që njihet si “rruga kufitare” vijon të jetë problematike për të gjithë banorët që e përdorin. Rruga në fjalë ishte dikur në inventarin e Autoritetit Rrugor Shqiptar, ndërsa tani i ka kaluar Bashkisë Bulqizë. Ndërkohë, banorët që jetojnë përgjatë saj thonë se gjendja e rrugës kufitare mbetet e degraduar edhe pse gropat mbushen herë pas here me zhavorr nga punëtorët e mirëmbajtjes. Banorët kërkojnë që në këtë rrugë të bëhet investim i mirëfilltë dhe jo sa për të kaluar radhën. Ata presin që rruga të asfaltohet ashtu siç iu është premtuar. Fiqiri Velia thotë se historikisht zona e Gollobordës është lënë pas dore dhe nuk është bërë asnjë investim i duhur në të, çka ka sjellë edhe braktisjen e fshatrave nga ana e banorëve.
Situata në rrugën kufitare bëhet më problematike kur ka reshje shirash pasi në të gjithë rrugën krijohen gropa të mëdha, të cilat vështirësojnë qarkullimin e automjeteve.
