Kruja është qyteti tjetër i cili iu shtua hartës së zonave të nxehta që u prekën nga Covid-19.
Vetëm në 24 orët e fundit, 17 raste të reja e çuan numrin total në 40 persona të infektuar.
Florind Çerhozi, Sekretar i Përgjithshëm i Bashkisë Krujë, shprehet: “Në fazën e parë të mbylljes, Kruja kishte vetëm 5 të infektuar në Thumanë. Por, në javën e dytë të prillit patëm një vatër në një biznes fason. Momentalisht janë rreth 40 të infektuar, ku 30 janë punonjës të bizneseve fason”.
Situata është akoma më e vështirë kur në Drejtorinë e Shëndetit Publik të Krujës, ka vetëm 8 epidemiologë nga 27 bluza të bardha në këtë qendër, e për pasojë e bën më të vështirë edhe gjurmimin e rasteve të reja.
Por, pandemia ka prekur dhe turizmin e këtij qyteti.
“Dy muzetë e Krujës, bashkë me pazarin, edhe sikur të hapen, do të jetë i vështirë rekuperimi pasi nuk ka turistë”, theksoi Çerhozi.
Vatrat e infektimit u kthyen fabrikat e fasonerisë, por qytetarët, disa prej të cilëve punojnë aty, shprehen se po ruajnë distancat.
