Ministri i Drejtësisë Ulsi Manja ka reaguar pas publikimit të një bisede në Whatsapp me deputetin demokrat Flamur Noka të publikuar sot në media, ku është e paqartë përmbajtja e komunikimit mes tyre. Nga foltorja e Kuvendit, Manja deklaroi se Alibeaj ka folur për një komplot me “Foltoren” e Berishës por theksoi se me Nokën ka 10 vite në një sallë parlamenti dhe nuk është faji i tij pse demokratët e kanë shpallur kulak.

“Mësova që zoti Alibeaj paska folur për një komplot te qeverise me foltoren, pa një sms timin me z.Noka. Po mor zotëri, njerëz jemi, shqiptar jemi. Kam 10 vjet me Flamur Nokën në këtë sallë. Po tani pse e keni shpallur ju Flamur Nokën kulak nuk është faji im. Do flas edhe me Flamurin edhe me ju. Se ju nesër mund të pajtoheni. Komplot i madh i Foltores me qeverinë Rama.

Tani që ju keni këtë hallin njëri thotë Rama është me Foltoren, tjetri thotë është me këtë tjetrën. Ju ftoj që mirë që nuk bëheni si formacion politik, por të paktën jepni kontributin si qytetar në këshillimin kombëtar. Sa për luftën kundër korrupsionit këtu kemi diferencë. Po miratojmë disa ligje për të forcuar luftën kundër korrupsionit. Ky ishte sot debati real. Korrupsioni nuk luftohet vetëm me fjalë. Kush ka thënë në këtë sallë. Luftohet edhe përmes mekanizmit ligjor.

Luftohet çdo ditë. Mos kujtoni se ata që na ndjekin ju besojnë ju në këtë që thoni. Sepse nuk i besoni ju vetë këto që thoni në Foltore. Duke qenë se jemi në ligjin e noterisë, nga mbi 400 licenca noterësh, 319 i keni dhënë ju. Tani flisni ju për sistemin noterial. Kjo nuk duhet t’iu pengojë të bashkoni votat me ne për ligjin e noterisë.  Janë rekomandime që na i kanë dhënë organizmat kombëtarë që kemi marrë”, deklaroi Manja.

Një emër tjetër është zbuluar nga ana e socialistëve për zgjedhjet e pjesshme të 6 Marsit. Gazetari Muhamet Veliu duke iu referuar burimeve nga PS raporton se në takimin e kryeministrit Edi Rama, me drejtuesin politik të qarkut Dibër, Ulsi Manja dhe deputetët e qarkut, është propozuar emri i Rrahim Spahiut për qarkun e Dibrës.


Spahiu prej vitesh ai punon si drejtor i një banke të rëndësishme në vend. Deri në vitet 2000 ai ka punuar në një bankë private në qytetin e Peshkopisë dhe ka pasur njohje e marrëdhënie mjaft të mira me banorët e kësaj zone.

Banorët e zonës së “5 majit” dhe Laprakës i kanë kërkuar ndihmë deputetit të Partisë Demokratike, Xhelal Mziut, teksa ky i fundit u pa nga banorët duke u futur në Kuvend.

Teksa Mziu futej në Kuvend, ata i kanë bërë thirrje që ‘i bashkohet protestës së tyre, duke mos e kursyer edhe ironinë.

“YYYYY o mashtuese, o Xhelal mashtruesi. Po hajde thuaje dhe ti nje fjalë për ne. Apo do ndërtohesh edhe ti tek Unaza?,”-thanë njëzëri protestuesit.

Deputeti i Partisë Demokratike, Kreshnik Çollaku ka kërkuar që lufta e brendshme në PD të ‘spostohet’ pas datës 6 mars, kur do të zhvillohen zgjedhjet e pjesshme lokale.

Ai shprehu besimin se PD mund të fitojë në 5 nga 6 bashkitë ku do zhvillohen zgjedhjet, por gjithmonë në rast se Komisioni i Rithemelimit nuk del me kandidatët e saj më vete apo në bashkëpunim me LSI ose koalicione të tjera, gjë e cila do dëmtonte shumë PD-në.

Në fakt, Çollaku e sheh kandidimin më vete të Komisionit të Rithemelimit si një ‘dhuratë’ në tavolinë për kryeministrin Edi Rama.

Flet Kreshnik Collaku

Data 6 mars, zgjedhjet në 6 bashkitë, ngjajnë pak si kripë mbi plagët e krijuara në tensionet e brendshme në PD, që filluan pas datës 9 shtator kur z.Basha mori një vendim për të respektuar një standard të PD-së me SHBA-të. Nuk kemi çfarë t’i fshehim më këtyre tensioneve. Kulmi u arrit në sulmin e datës 8 janar. Patjetër ne kemi detyrën të ballafaqohemi me këtë situatë. Ideja për të gjetur një kandidat fitues në Bashkinë Dibër, ka filluar të shqyrtohet që në zgjedhjet e 25 prillit. Në 5 nga 6 bashkitë PD ka shance shumë të mira për t’i fituar. Kam parë qëndrimet e një grupi ish-zyrtarësh të PD, një grup njerëzish që për motive te drejta apo të padrejta kanë qëndrim refrektar ndaj PD-së, që siç u pa dhe dje nga vendimi i Gjykatës së Tiranës kanë një kryetar të ligjshëm. Ka një grup të pakënaqurish që kanë kontestuar zotin Basha. Në këtë situatë zgjedhore,  ky grup duket se nuk administron dot inatin kundër Lulzim Bashës. Interesi më i madh është fitorja e demokratëve në ato zona. Edhe nëse është fitore, dhe nëse është humbje, nuk i shkakton asgjë Lulzim Bashës, në kuptimin e një spalete të hequr apo të shtuar. Kush humbet? Nëse vazhdojmë në këtë retorikë përçarëse, humbasin demokratët tanë në këto 6 bashki. Ky grup njerëzish duhet të ndalet dhe mos shikojë 6 marsin si një mundësi për të ndëshkuar Lulzim Bashën.  Të mos sabotojnë fitoren e PD-së duke prodhuar kandidatë brenda llojit, apo nën koalicione me LSI, që në datë 7 mars të kenë argumente më shumë për të sulmuar Lulzim Bashën. Ka argumente boll për ta sulmuar Bashën. Nxjerrja e disa kandidaturave brenda PD-së do të ishte një dhuratë në tavolinë për mazhorancën socialiste që as nuk do ta kishte imagjinuar që do drejtonte bashkinë e Shkodres një ditë.

Është zhvilluar këtë të Mërkurë mbledhja e parë e Organit Këshillues që drejtohet nga Prefekti i Qarkut Dibër, Nexhbedin Shehu. Ky organ përbëhet nga Kryetarët e katër Bashkive të Qarkut Dibër, nënprefektët dhe drejtuesit e institucioneve kryesore qëndrore në nivel vendor në Qark. Në këtë mbledhje, kryetarët e Bashkive Mat, Bulqizë, Klos e Dibër, pasi bënë një rezyme të punës së vitit të kaluar, shpalosën objektivat e vitit 2022 të cilat konsistonin në investime në infrastrukturën rrugore, ujin e pijshëm, systemin vaditës, menaxhimin e mbetjeve urbane etj.

Ndërkohë, Prefekti Nexhbedin Shehu tha se ky organ zhvillon takime përmujore ku përcaktohen detyra dhe raportohet për realizimin e tyre.

Po ashtu në këtë mbledhje raportuan edhe drejtuesit e institucioneve qëndrore në nivel vendor të cilët janë pjesë e organit këshillues pranë prefektit të Qarkut Dibër.