Policia e Tiranës në bashkëpunim me atë të Shkodrës, RENEA-n dhe Forcat e Ndërhyrjes së Shpejtë kanë arrestuar sot dy persona me rrezikshmëri të lartë shoqërore.
Nga ky operacion u vu në pranga shtetasi i shapllur në kërkim Barush Bregu , 33 vjeç, lindur në Shkodër. Siç njofton policia, ky shtetas rezulton i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie “Arrest në burg”, për armëmbajtje pa leje.
Gjithashtu po gjatë operacionit u arrestua në flagrancë edhe shtetasi B. Ç. 21 vjeç, banues në Shkodër për veprën penale “Përkrahja e autorit të krimit”.
Nga të dhënat e policisë, mësohet se 33-vjeçari rezulton i skeduar si pjesëtar i një grupi kriminal dhe është i dyshuar për ngjarje të tjera të rënda kriminale të ndodhura në qarkun Shkodër.
Njoftimi i policisë:
Operacion për kapjen e personave në kërkim, me rrezikshmëri të lartë shoqërore. Finalizohet me sukses operacioni policor “Kompleksi”. Kapet dhe arrestohet një pjestar i një grupi kriminal. Arrestohet edhe një shtetas tjetër për përkrahje të autorit të krimit.Operacioni nga Policia e Shkodrës, në bashkëpunim me Renean, FNSH e forcat Shqiponja të Drejtorisë Vendore të Policisë Tiranë. Operacioni u zhvillua në lagjen “Komuna e Parisit”, Tiranë, ku në një banesë të marrë me qera u kap dhe u arrestua shtetasi i shpallur në kërkim:
Barush Bregu , 33 vjeç, lindur në Shkodër. Ky shtetas është i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie “Arrest në burg”, për armëmbajtje pa leje , pasi në shtator të vitit 2018, gjatë një operacioni të zhvilluar nga Policia, në banesën e këtij shtetasi u gjet një armë zjarri kallashnikov dhe municion luftarak.
Gjithashtu ky shtetas është i skeduar si pjesëtar i një grupi kriminal dhe është i dyshuar edhe si autor për ngjarje të tjera të rënda kriminale të ndodhura në qarkun Shkodër më parë, si dhe autor i dyshuar për “Trafikim të lëndëve narkotike”.
Po gjatë operacionit u arrestua ne flagrance dhe shtetasi B. Ç. 21 vjeç, banues në Shkodër për veprën penale “Përkrahja e autorit të krimit”. Materialet do ti kalojnë Prokurorisë së Rrethit Gjyqësor Shkodër për veprime të mëtejshme, për veprat penale të “Mbajtja pa leje dhe prodhimi i armëve, armëve shpërthyese dhe i municionit” dhe “Kultivimi i bimëve narkotike, e kryer në bashkëpunim”-thuhet në njoftim.
Gazetarja Dorjana Bezat raportoi më herët për “Balkanweb” se ky operacion po kryhet për llogari të një qarku tjetër dhe tashmë gjithçka është sqaruar edhe nga policia.
