Ulje e Akcizës mbi Karburantin në Itali: Lehtësim për 20 Ditë

Qeveria italiane ka vendosur të ndërhyjë me një ulje të përkohshme të akcizës mbi naftën dhe benzinën, me qëllim lehtësimin e barrës së rritjes së çmimeve të karburantit për qytetarët.

Sipas vendimit, akciza mbi karburantin është reduktuar me rreth 20 cent për litër. Kjo ulje pritet të jetë e ndjeshme, ndonëse është pak më e vogël sesa 25 centët për litër që u njoftuan fillimisht.

Kjo masë do të hyjë në fuqi për 20 ditë, me shpresën për të lehtësuar barrën e konsumatorëve në një kohë kur në shumë pjesë të vendit, çmimi i karburantit kaloi 2,1 eurot për litër. Kjo lëvizje vjen ndërsa tregjet ndërkombëtare të energjisë po përjetojnë luhatje të forta, duke ndikuar direkt në koston e jetesës për qytetarët.

Përveç uljes së taksave mbi karburantet, ekzekutivi i Giorgia Melonit ka paralajmëruar edhe shtimin e kontrolleve ndaj kompanive të tregtimit të karburanteve, me qëllim parandalimin e abuzimeve me çmimet.

Në të njëjtën kohë, janë planifikuar fonde shtesë për të mbështetur sektorët më të prekur, përfshirë transportin dhe bizneset e vogla. Qeveria italiane synon të shpenzojë 608 milionë euro në formën e përjashtimeve tatimore për të ndihmuar kompanitë e transportit rrugor që të blejnë naftë.

Zëvendëskryeministri, njëherazi Ministër i Transportit, Matteo Salvini, argumentoi se është e domosdoshme të rikthehet çmimi i naftës nën 1,90 euro për litër.