Tragjike në Bulqizë, kushëriri vret kushëririn

Një ngjarje tragjike ka tronditur këtë të enjte fshatin Tërnovë të Vogël në Bulqizë, ku një dalje për gjueti nga dy kushërinj ka përfunduar me vrasje. Rreth orës 12:00, në pyllin e fshatit, 36-vjeçari Vasil Kamberi humbi jetën pasi u plagos me armë gjahu nga kushuriri i tij i parë, Flamur Kamberi, 34 vjeç.

Sipas të dhënave paraprake, dy të rinjtë kishin dalë si zakonisht për gjueti. Në momentin tragjik, Vasil Kamberi u plagos rëndë dhe humbi jetën gjatë transportimit me helikopter drejt spitalit, për shkak të plagëve të marra. Autoritetet konfirmojnë se arma e përdorur ishte një çifte gjuetie.

Policia ka shoqëruar në Komisariatin e Bulqizës autorin e dyshuar të ngjarjes, Flamur Kamberin, për të kryer veprime të mëtejshme hetimore. Ndërkohë, ngjarja ka ngritur pikëpyetje mbi rrethanat e saj, duke qenë se të rinjtë ndodheshin në pozicione të ndryshme gjatë gjuetisë.

Hetimet paraprake sugjerojnë se ngjarja mund të jetë një aksident tragjik. Flamur Kamberi dyshohet se ka ngatërruar kushuririn e tij me ndonjë kafshë të egër në momentin e të shtënave, por rrethanat e sakta mbeten ende për t’u sqaruar nga autoritetet.

Çështja tashmë i ka kaluar Prokurorisë së Shkallës së Parë të Juridiksionit të Përgjithshëm Dibër, e cila do të zbardhë të vërtetën e ngjarjes së rëndë. Banorët e fshatit Tërnovë të Vogël shprehen të tronditur nga kjo tragjedi, ndërsa familjet e përfshira përballen me një humbje të dyfishtë dhe të dhimbshme.