Fshati Suç në Njësinë Administrative me të njëjtin emër në Bashkinë e Klosit është i vetmi fshat në të gjithë Matin që ende nuk është futur në procesin e regjistrimit të tokës, bazuar në ligjin 7501 të vititi 1991.
Në hartën që përcakton ngastrat bujqësore në Mat, fshati Suç është i papërcaktuar, duke bërë që banorët të mos kenë mundësinë të regjistrojnë tokat e tyre bujqësore apo banesat.
Mat Televizion ka mësuar nga Zyra e Regjistrimit të pasurive të paluajtshme Mat se ky fshat nuk ka qenë asnjëherë në sistem pasi nuk janë pranuar nga vendimet e ndarjes së tokës nga komisionet e vendore për ndarjen e tokës. Në disa raste janë konstatuar mbivendosje e kjo ka bërë që të hapen pretendime nga shumë disa banorë për të njëjtën pronë, të cilët edhe aktualisht vazhdojnë vazhdojnë proceset gjyqësore mbi të drejtën e pronësisë.
Po ashtu mësohet se nga banorët ka patur pretendime edhe për ndarje të padrejtë bazuar në çertifikatën e trungut familjar të vitit 1991. Nisur nga këto problematika, azhornimi i tokave bujqësore në këtë fshat, mund të bëhet vetëm me ngritjen e një komisioni nga Bashkia Klos, për ndarjen nga fillimi bazuar në çertifikatat e trungut familjar të vitit 1991.
