Këngëtari i njohur i muzikës rap Arkimed Lushaj, i njohur gjerësisht me emrin e artit Stresi ishte mes 9 personave të proceduarve penalisht nga policia për protestën e një ditë më parë të thirrur nga Aleanca për Mbrojtjen e Teatrit Kombëtar.
Emri i tij figuronte përkrah kryetarëve të PD-LSI, Lulzim Basha e Monika Kryemadhi por edhe mes artistëve të nderuar Robert Budina dhe Neritan Liçaj.
Por pas këtyre zhvillimeve ka ardhur dhe reagimi i reperit i cili me anë të një postimi në Instagram me një kapele policie në kokë ka një mesazh të qartë për uniformat blu.
“I bëj thirrje gjithë policisë së shtetit ne jemi qytetarë të thjeshtë, dalim në protestë për të drejtat tona. Unë po e heq kapelen, hiqeni dhe ju, bëhuni qytetarë dhe silluni mirë me popullin shqiptar, edhe ne jemi në rregull me ju”, thotë Stresi.
Krahas muzikës, Stresi është i njohur si një mbështetës i Partisë Demokratike duke marrë pjesë në shumicën e protestave të organizuara prej saj së bashku me babain e tij Sali Lushaj, mbështetës i vjetër i PD dhe ish bodigardi i ish-kryeministrit Berisha.
