Shërbimi spitalor në Spitalin Bashkiak “Xhavit Mara”, Mat, pritet të plotësohet gjatë muajve në vazhdim me burime të reja njerëzore e materiale. Duke qenë se në këtë spital mungojnë disa mjekë specialistë prej vitesh, Drejtori i këtij spitali, Erion Bala tha se në koordinim me Ministrinë e Shëndetësisë po bëhet e mundur që specializantët e rinj që mbarojnë këtë vit studimet të vijnë edhe të ushtrojnë profesionin e tyre në spitalin e Burrelit. Bala shtoi se do të mundësohen edhe aparatura të reja të cilat i kanë munguar këtij spitali.
Godina e pavioneve i është nënshtruar rikonstruksionit, i cili sipas Balës, ka rritur cilësinë e kushteve të shërbimit ndaj pacientëve, por edhe kursimin e energjisë, pasi mbi të janë vendosur një set panelesh diellore.
Po ashtu, Drejtori i Spitalit Bashkiak Mat, Erion Bala, tha se është planifikuar edhe një rikonstruksion total i spitalit dhe përqendrimi i shërbimit në një godinë.
Në spitalin Bashkiak Mat marrin trajtim mjekësor gjithë qytetarët e rrethit të Matit si dhe një pjesë e qytetarëve nga Bulqiza.