Lugina e Shkopetit mbetet një ndër perlat natyrore të vendit tonë. Me liqenin që e ndan përmes dhe bimësinë e dendur në të dy anët dhe rrugën automobilistike, është ndër luginat më të veçanta.
Kjo luginë e mori këtë pamje pas ndërtimit të hidrocentralit të Shkopetit, pasi më parë ishte vetëm rrjedha e lumit Mat që zbret e derdhet në detin Adriatik.
Stina e pranverës është ajo më magjepsja në luginë pasi gjelbërimit i shtohen lule me ngjyra të ndryshme, duke e bërë pamjen mahnitëse. Por ndonëse pak vite më parë nëpër këtë luginë kalonte i gjithë Qarku Dibër, sot rruga që përshkon atë është thuajse pa asnjë lëvizje. Kjo për shkak se i gjithë trafiku i makinave është zhvendosur në rrugën e Arbrit. Megjithatë, pritet që në periudhën në vazhdim të shtohet fluksi i atyre që vizitojnë luginën e Shkopetit, kjo falë edhe promovimit të saj që i është bërë në media dhe rrjetet sociale.
Një ndër zonat më të vizituara mbetet ura tip pasarel që lidh fshatin Madhesh me rrugën nacionale. Por së fundmi kësaj perle natyrore po i shtohet edhe një atraksion tjetër që pritet të tërheqë interesin e vizitorëve. Bëhet fjalë për ballkonin që po ndërtohet për të gjithë ata që duan të fiksojnë me aparatet e tyre, veten dhe të tjerë që e shoqërojnë, në peisazhin e kësaj bukurie natyrore.
Ajo që vijon t’i mungojë kësaj lugine janë subjektet akomoduese apo biznese që ofrojnë shërbime gastronomike, në mënyrë që vizitorët e luginës piktoreske të Shkopetit të mund ta shijojnë në komoditet të plotë këtë bukuri të rrallë natyrore.
