Reshjet e shiut të rëna ditët e fundit kanë shkaktuar dëme në bujqësi. Dëmi më i madh ka qenë tek barërat që korren në këtë periudhë, për tu përdorur gjatë stinës së dimrit si ushqim për bagëtinë. Fermeri Elez Elezi, nga fshati Bërshi i Klosit, thotë se reshjet e vazhdueshme të shiut nuk po e lënë barin të thahet dhe ai po kalbet në fusha. Këto dëme i shtohen edhe dëmeve të mëdha që shkaktuan ngricat e Prillit ku dëmtuan thuajse të gjithë pemtarinë. Fermeri Elez Elezi shprehet se këtë vit çdo produkt që mund ta siguronin nga pemët e tyre do të duhet ta sigurojnë nëpërmjet blerjes në treg pasi nuk ka mbetur asgjë.
Nga ana tjetër, fermerët shpresojnë që kushtet e motit të përmirësohen dhe të mbjellin kulturat e tjera bujqësore, në mënyrë që të mos mbeten pa asnjë lloj prodhimi në bujqësi këtë vit.