Qarku i Dibrës u përfshi nga reshjet e dëborës ditën e djeshme ku trashësia në zonat malore shkoi deri në 30 cm. situatë shumë problematike u krijua në rrugën e Arbrit e cila u bllokua për më shumë se tre orë për shkak të prezencës së dëborës dhe akullit. Tjetër rrugë problematike ishte edhe ajo që lidh Matin me rrugën e Arbrit. Vetëm rreth mesnatës është bërë e mundur që qarkullimi në këto rrugë të bëhet normalisht dhe paprobleme.
Ndërkohë, prefekti i Qarkut Dibër Nexhbedin Shehu tha se situata këtë të hënë është normalizuar dhe se nuk ka probleme me qarkullimin e automjeteve qoftë në rrugët nacionale e qoftë në ato rurale.
Shqetësim për prefektin Shehu mbetet dëmi që mund të shkaktojnë ngricat qoftë në frutikulturë e qoftë në sektor të bujqësisë pasi është periudhë e lulëzimit të pemëve frutore apo bimëve të tjera bujqësore.
Temperaturat pritet të jenë të ulta edhe në dy ditët në vijim ku në Peshkopi e Bulqizë pritet të zbresin deri në – 6 gradë Celsius.