Shumë fshatra në qarkun e Dibrës i gjen me ndërtesa të rrënuara për shkak të braktisjes masive nga ana e banorëve prej vitesh. Por ndryshe është situata në fshatin Homesh të Njësisë Administrative Shupenzë në Bashkinë Bulqizë. Në këtë fshat shumë shtëpi janë ndërtuar krejtësisht të reja, madje edhe vila dhe shumë pak ka banesa të cilat janë rrënuar. Por kjo nuk ndryshon asgjë sa i përket largimit të banorëve. Vilat e bukura, që janë ndërtuar nga emigrantët, qëndrojnë bosh, pasi askush nuk jeton në to. Ato pak banorë të mbetur ende në fshatin Homesh janë të moshës së tretë dhe jetojnë pa fëmijët e tyre. Dikur fshati kishte me qindra fëmijë e të rinj, por sot është kthyer si një fshat azilantësh. Të moshuarit e mbetur ende në fshat i kanë humbur shpresat për rikthimin e atyre banorëve që janë larguar në emigracion.

Ndryshe nga shumë fshatra të tjerë në Bulqizë, Homeshi ndodhet pranë rrugës nacionale Bulqizë – Peshkopi, por mungesa për të ndërtuar të ardhmen në vendlindjen e tyre, ka bërë që të rinjtë por jo vetëm, ta braktisin fshatin.

  Prej 31 vitesh prindërit Tofik e Lirie Meta, nga fshati Homesh i Shupenzës në bashkinë Bulqizë, janë në kërkim të djalit të tyre. Ylberi ishte vetëm 16 vjeç para 3 dekadash kur mori rrugët e emigrimit. Ai është nisur bashkë me një mik të familjes drejt shtetit fqinj të Greqisë, por humbi kontaktet vetëm pak kohë pasi kishte arritur në Selanik. Mes dhimbjes së madhe të humbjes së birit të tij, i ati Tofiku thotë se prej më shumë se që prej vitit 1994 nuk mori vesh më asgjë për djalin e tij.

Mes lotësh në sy e me foton e djalit në dorë, nëna e Ylberit ka një apel të madh për të gjithë shqiptarët që jetojnë në shtetin grek e sidomos për ata që jetojnë në zonën e Selanikut ku mendohet se Ylberi jetoi për disa kohë. Ajo kërkon të zbulohet nëse djali i saj, që sot duhet të jetë rreth 47 vjeç, është gjallë apo jo.

 Megjithëse kanë kaluar kaq shumë vite, prindërit e Ylber Metës shpresojnë ende të marrin një lajm të mirë për djalin e tyre.

   Prefekti i Qarkut Dibër, Nexhbedin Shehu mblodhi këtë të mërkurë organin këshillues pranë institucionit që drejton për sigurinë në shkolla. Në këtë mbledhje morën pjesë drejtues të zyrave vendore të arsimit në katër bashkitë e qarkut, përfaqësues të arsimit në bashki, nënprefektët e Matit dhe Bulqizës, Hasan Pasha e Avni Muliu, drejtuesit e policisë në qark etj. Prefekti Nexhbedin Shehu tha se është bërë një analizë e situatës në përgjithësi në të gjitha shkollat e qarkut Dibër, ndërsa është evidentuar rasti i pak javëve më parë në shkollën e mesme të Bashkuar “Gjergj Kastrioti” në Baz. Prefekti listoi edhe disa problematika të tjera, të cilat u lanë detyrë që të zgjidhen sa më parë nga institucionet vendore.

Siguria në shkolla mbetet një nga sfidat e vazhdueshme të institucioneve qëndrore por edhe atyre vendore, për shkak të ngjarjeve që kanë ndodhur kohët e fundit mes adoleshentëve.

Minatorët e minierës më të madhe në Bulqizë, e cila administrohet nga kompania turke “Yildirim Holding”, kanë mbyllur protestën e tyre pas 3 javësh bojkot të punës.

Minatorët, të cilët ishin angazhuar në protestë që prej fillimit të muajit Mars, thanë se një ditë më parë kanë rënë në një marrëveshje me kompaninë turke, e cila ju ka plotësuar disa nga kërkesat.

Mësohet se nga 15% rritje page, është rënë dakord që për këtë vit, kompania të bëjë një rritje prej 5% dhe pjesën tjetër të rritet vitin e ardhshëm. Po ashtu, është rënë dakord që puna të vijojë si më parë me dy ditë pushim në fundjavë, të shtunën dhe të dielën, ndryshe nga kërkesa e kompanisë që të punohej edhe ditët e shtuna.

Kërkesat e minatorëve janë arritur të pranohen pas një sërë negociatash që zhvilluan përfaqësuesit e kompanisë turke me një përfaqësi të minatorëve.

Kujtojmë se protesta e minatorëve të Bulqizës nisi në fillim të këtij muaji, pasi kompania turke “Yildirim Holding”, sipas protestuesve, kishte shkelur kontratën e punës. Kjo protestë erdhi pas shumë vitesh që në qytetin e minatorëve, Bulqizë, nuk zhvillohej asnjë protestë nga ana e punëtorëve të nëntokës për shkak edhe të braktisjes nga sindikatat.