Që prej datës 14 Mars, kur u hap për qarkullim tuneli i Murrizit, bypassi i kësaj rruge ka dalë thuajse totalisht jashtë funksionit. Të vetmit përdorues ka banorët e disa lagjeve të fshatit Xibër – Murrize, por edhe ata që duan të kalojnë kohë në natyrë në vendin e quajtur “Qafa e Murrizes”. Gjatë një muaji afërsisht që nuk përdoret më bypassi i Murrizit, rruga nuk ka patur asnjë lloj mirëmbajtje dhe këtë e tregojnë gurët e rënë aty që sa vijnë e mbushin asfaltin. Të paktët drejtues mjetesh që e përdorin ende këtë rrugë kërkojnë që ajo të vijojë të mirëmbahet pasi mund të ketë raste emergjence në tunelin e Murrizit dhe qarkullimi i automjeteve devijohet nëpërmjet bypassit për të mos penguar lëvizjen normale të qytetarëve.

Sipas përdoruesve të bajpasit të Murrizit, mosmirëmbajtja periodike e kësaj rruge mund të çojë në degradimin total të saj dhe të bëhet e pakalueshme qoftë për banorët e Xibër Murrizes e qoftë për ata që duan ta përdorin për shkak të shijimit të natyrës dhe peizazhit që piktoresk që ky vend ofron.

  Situata në rrugën nacionale Ura e Matit  – Rrëshen vijon të mbetet e njëjtë pasi edhe pse ka një firmë mirëmbajtëse, gjendja paraqitet e degraduar. Sipas përdoruesve të kësaj rruge, Kompania “Shehu” shpk nuk duket askund për të mbushur gropat e hapura në këtë aks rrugor apo për të ndaluar dëmtimin e mëtejshëm të këmbës së urës në vendin e quajtur “Sukbull”.

Siç duket nga pamjet, vetëm disa shiritë janë vendosur mbi zgavrën e hapur në hyrjen lindore të urës dhe asgjë më shumë. Ndonëse gjendja e saj është e tillë prej kohësh, asnjë masë nuk është marrë nga kontraktori për mirëmbajtje.

Ashtu si ura që ndan Matin me Mirditën edhe kjo urë rrezikon të shembet nëse nuk ndërhyhet në kohë ku për specialistët kostoja e ndërhyrjes do të jetë shumë më e lartë se sa tani.

Drejtues të drejtorisë së mirëmbajtjes pranë Autoritetit Rrugor Shqiptar i thanë “Mat Televizion” se janë marrë masa ndaj kompanisë në fjalë dhe se pas një jave rruga do t’i kalojë për mirëmbajtje një tjetër kompanie.

Po ashtu, ARRSH thotë se do t’i kërkojë kompanisë së re që do të nisë mirëmbajtjen e këtij aksi javën e ardhshme, që të bëjë ndërhyrje të menjëhershme jo vetëm tek urat që janë në rrezik, por edhe në trase dhe ta bëjë atë lehtësisht të kalueshme.

Hapja për qarkullimin e të gjitha automjeteve në tunelin e Murrizit pjesë e rrugës së Arbrit ishte një lehtësi e madh për të gjithë qytetarët që duan të lëvizin drejt Qarkut Dibër apo kryeqytetit.

Por ajo që mbetet shqetësuese është prania e tymërave në brendësi të tunelit.

Qytetarët denoncojnë se vetëm një pjesë e vogël e ventilatorëve që pastrojnë ajrin vendosen në punë, ndërsa pjesa tjetër qëndrojnë të fikur. Në mungesë të sistemit të plotë të ajrosjes, në brendësi të tnuelit akumulohet tym i krijuar nga gazrat e automjeteve që kalojnë gjatë gjithë kohës.

Në një video të dërguar nga qytetarët shihet se në mesin e tunelit pamja është e turbullt për shkak të tymit që është akumuluar nga djegia e karburantit të automjeteve, por edhe nga kalimi i mjeteve të tonazhit të rëndë me ngarkesë asfaltike që po përdoret për shtrimin e rrugës së fshatit Gurë i Bardhë në Bashkinë e Klosit.

  Dëbora e rënë të dielën e javës së kaluar vijon të jetë ende prezente në zonat e thella malore të Bulqizës. Në fshatin Ostren i Madh të zonës së Gollobordës, ka ende prezencë të dëborës gërshetuar me gjelbërimin pranveror që kishte nisur. Por banorët janë të shqetësuar për dëmet e mëdha që i janë shkaktuar bujqësisë e kryesisht frutikulturës. Ata shprehen se temperaturat gjatë natës kanë zbritur deri në minus 7 gradë Celsius duke lënë pasoja të rënda në frutikulturë.

Qani Muça me profesion specialist bujqësie konfirmon se dëmet janë shumë të mëdha nga ngricat gjatë natës. Fakti shqetësues sipas tij është se askush nga institucionet nuk është parë në fshat për tu interesuar për dëmet që ju janë shkaktuar fermerëve. Muça shton se më të dëmtuara janë qershitë, kumbullat, dardhat etj.

Për shkak të temperaturave të ulta, banorët e Ostrenit të Madh thonë se dëmet do të rriten akoma më shumë në ditët në vijim.