Mjetet e tonazhit të rëndë që do të lëvizin nga Qarku Dibër në drejtim të Tiranës duke përdorur rrugën e Arbrit, nuk do të duhet ta përdorin këtë aks rrugor në një fashë kohore të përcaktuar.

Ndonëse për 4 ditë me radhë nga hapja e tunelit u lejua që makinat që transportojnë krom të përdornin rrugën e Arbrit, nga kjo e martë ato nuk janë lejuar më. Drejtues të mjeteve të tonazhit të rëndë thanë për “Mat Televizion” se ju është komunikuar nga autoritetet policore që të mos e përdorin këtë rrugë nga ora 6 e mëngjesit deri në orën 20:00 të mbrëmjes çdo ditë.

Vendimi për të mos lejuar qarkullimin e këtyre automjeteve në rrugën e Arbrit nuk është marrë për të ruajtur jetëgjatësinë e asfaltit por për shkak se krijojnë trafik të dendur për automjetet e tjera që qarkullojnë në këtë rrugë.

Që prej mëngjesit të së martës, shumë makina me krom janë parkuar në Qaf Buall për të pritur orarin zyrtar ku lejohet qarkullimi në rrugën e Arbrit për to.

Megjithëse vendimi iu është komunikuar një pjese të madhe të drejtuesve të automjeteve të rënda apo subjekteve minerare, ende nuk ka një tabelë që informon drejtuesit e këtyre mjeteve që qarkullimi në rrugën e Arbrit është me fashë të përcaktuar orare.

Ndryshimet e menjëhershme të motit kanë rikthyer reshjet e borës në zonat e thella të Dibrës dhe Bulqizës. Bora ka zbardhur fshatrat mbi 1000 metra mbi nivelin e detit.

Ndërkohë, sipas strukturave të mbrojtjes civile në Bashkitë Bulqizë e Dibër, deri tani nuk janë shfaqur probleme sa i përket qarkullimit të automjeteve në rrugët rurale.

Në zonat deri në 1000 metra mbi nivelin e detit ka patur reshje të dendura shiu. Gjatë orëve të mbrëmjes së të hënës temperaturat pritet të zbresin në vlera negative, ç’ka mund të sjellin edhe ngrica.

Nga ana tjetër fermerët i druhen pasojave në frutikulturë, pasi shumë pemë frutore kanë çelur ditët e fundit kur temperaturat shkuan deri në 26 gradë celsius. Pemët frutore si qershitë, kajsitë, mollët dhe dardhat mund të jenë në lulëzim ose në fazën e formimit të frutave dhe temperaturat nën zero dëmtojnë lulet dhe embrionet e fryteve, duke ulur ndjeshëm rendimentin. Edhe vreshtat janë gjithashtu të ndjeshme, pasi ngricat mund të dëmtojnë sythat e rinj dhe të ndikojnë në prodhimin e rrushit.

Ndërkohë, sinoptikanët parashikojnë që edhe në dy ditët në vijim të ketë rënie të temperaturave deri në minus 5 gradë Celsius në zonat malore, ndërsa nga e enjtja, temperaturat pritet të rriten ndjeshëm.

   Ditën e verës, me 14 Mars, u hap qarkullimi për të gjitha llojet e automjeteve në tunelin e Murrizit, vepra e fundit e rrugës së Arbrit që kishte mbetur pa përfunduar. Tashmë të gjithë qytetarët që lëvizin nga Tirana në drejtim të Qarkut Dibër dhe Maqedonisë së Veriut apo anasjelltas, përdorin këtë tunel duke shmangur bypassin e Murrizit. E ndërsa tashmë kalojnë me qindra automjete në ditë, në tunelin e gjatë prej 3.8 kilometrash dyshohet se mungon vetilimi. Sistemi i pastrimit të ajrit në brendësi të tunelit, sipas disa drejtuesve të mjeteve që e përshkojnë atë, ende dyshohet se nuk është vendosur në punë, ndonëse aty shkarkohen gazra të dëmshëm gjatë gjithë ditës si pasojë e kalimit të qindra automjeteve. Këta drejtues mjetesh kërkojnë që sistemi i ventilimit, nëse nuk funksion, të vendoset urgjentisht në punë, pasi në tunel, thonë ata, krijohet ajër toksik nga qarkullimi i qindra makinave.

Një tjetër shqetësim që ngrenë drejtuesit e mjeteve që qarkullojnë në rrugën e Arbrit është edhe kalimi i mjeteve të tonazhit të rëndë, që sipas tyre ato mund ta dëmtojnë shumë shpejt këtë rrugë, siç kanë dëmtuar edhe rrugën Klos – Burrel – Skuraj.

Dhjetra banorë të Mirditës, Matit dhe Dibrës u mblodhën në një protestë për rrugën Perlat – Lurë, investim i nisur tre vite më parë por që ende nuk ka përfunduar. Protestuesit u mblodhën në vendin e quajtur “Livadhi Turkut” aty ku nis rruga Perlat – Lurë. Rruga duhej të ishte asfaltuar por punimet kanë mbetur në vendnumëro. Protesta e thirrur nga shoqëria civile mblodhi dhjetra banorë të zonave Mirditë, Mat e Dibër. Protestuesit kërkuan që autoritetet të ndërmarrin hapat ligjor ndaj firmës e cila po zvarrit përfundimin e projektit. Ata thanë se protestat e tyre nuk do të ndalen por do të përshkallëzohen me bllokim të rrugës së kombit do të zhvendosen deri në Tiranë.

Protesta u mbyll paprobleme, ndërsa u monitorua nga policia lokale.

Fondi prej afro 12.6 milion euro për këtë vepër që do t’i shërbente shumë zhvillimit të turizmit në Lurë është një donacion i Bankës Europiane për Rindërtim dhe Zhvillim, i përfshirë nga qeveria shqiptare në Programin për Zhvillimin e Infrastrukturës dhe Turizmit në Shqipëri nëpërmjet Fondit Shqiptar të Zhvillimit.

  Është zhvilluar këtë të shtunë ndeshja e javës së 28 e kampionatit të kategorisë së parë në futboll mes ekipit “Burreli” dhe ekipit “Erzeni”. Takimi është luajtur në fushën e stadiumit “Liri Ballabani” të qytetit të Burrelit, ku djemtë e drejtuar nga trajneri Ditmar Bicaj arritën të marrin tri pikë të plota.

Ndeshja mes skuadrës vendëse dhe asaj mike prodhoi emocion megjithëse nuk pati tempin e një ndeshje të barabartë. Matjanët patën disa raste për të shënuar në portën mike por aksionet e Farrukut, Hotit, etj. nuk u finalizuan me gol.

I vetmi gol i këtij takimi erdhi nga pika e bardhë e penalltisë në minutën e 35. Pas një ndërhyrje të gabuar nga mbrojtja mike, kapiteni i skuadrës së Burrelit, Florenc Farruku nuk gaboi në gjuajtjen e tij, duke shënuar golin e vetëm të sfidës.

E gjithë loja u mbyll me rezultatin “Burreli” 1 e “Erzeni” i Shijakut 0, ndonëse edhe në fraksionin e dytë djemtë e drejtuar nga tekniku Bicaj patën disa raste. Me këto tri pikë, Burreli vijon të mbajë vendin e katërt në kuotën e 50 pikëve. Ndeshjet e tjera të luajtura këtë të shtunë përfunduan: Kastrioti – Vora 0 me 1, Pogradeci – Besa 0 me 1, Lushnja – Flamurtari 0 me 4, Apolonia – Valbona 2 me 1 dhe Korabi – Kukësi 1 me 1.

Është zhvilluar të premten e 14 Marsit, në Ditën e Verës, ceremonia e hapjes së tunelit të Murrizit për qarkullimin e të gjitha automjeteve, një pjesë e rëndësishme ky i rrugës së Arbrit. Me një ceremoni të veçantë ku morën pjesë drejtues të lartë të shtetit, si kryeministri Edi Rama, Zv/kryeministrja Belinda Balluku, Ministri i Drejtësisë Ulsi Manja, deputetë, drejtues të bashkive të qarkut Dibër etj., u bë hapja zyrtarisht për lëvizjen e qytetarëve me automjete nga Qarku Dibër drejt Tiranës dhe anasjelltas.

Nga ana tjetër, kryeministri Rama tha se kjo vepër është për të ardhmen dhe shigjetoi opozitën.

Qindra qytetarë ishin mbledhur në mënyrë festive në të dy anët e tunelit për të marrë pjesë në ceremoninë e hapjes së veprës së fundit për qarkullimin e automjeteve në rrugën e Arbrit. Tuneli i Murrizit është i gjatë rreth 3.8 kilometra dhe shkurton ndjeshëm kohën e distancën që kishte kalimi nëpërmjet bypassit të Murrizit.

Me përfundimin edhe të segmentit Herebel – Peshkopi, distanca nga Tirana në Dibër bëhet vetëm 74 kilometra dhe mund të mbërrihet për 90 minuta.

Një aksident rrugor ka ndodhur mbrëmjen e së enjtes në aksin rrugor Bulqizë-fshati Peladhi, ku shtetasi E.Z., teksa drejtonte automjetin tip ‘Foristrade’,  ka humbur kontrollin mbi drejtimin e tij dhe automjeti ka dalë nga rruga.

Si pasojë e aksidentit ka mbetur i dëmtuar drejtuesi i mjetit dhe 4 pasagjerë, të cilët janë transportuar drejt  Tiranës për ndihmë më të specializuar mjekësore,  ndërsa shtetasja M.Z.,  ka humbur jetën.

Grupi hetimor po punon për sqarimin e rrethanave të aksidentit.

Njoftimi i plotë

Bulqizë/Informacion paraprak

Rreth orës 21:20, në aksin rrugor Bulqizë-fshati Peladhi, shtetasi E.Z., teksa drejtonte automjetin tip ‘Foristrade’, ka humbur kontrollin mbi drejtimin e tij dhe automjeti ka dalë nga rruga.

Si pasojë e aksidentit ka mbetur i dëmtuar drejtuesi i mjetit dhe 4 pasagjerë, të cilët janë transportuar drejt Tiranës për ndihmë më të specializuar mjekësore, ndërsa shtetasja M.Z., ka humbur jetën.

Grupi hetimor po punon për sqarimin e rrethanave të aksidentit.