Plagoset me thikë një 20 vjeçar në Dibër, në Bulqizë gruaja plagos burrin me thikë
Dy ngjarje kriminale janë shënuar në fundjavë në Dibër e Bulqizë. Ngjarja e parë ishte ajo e një 19-vjeçari që plagosi me mjet prerës thikë një 20-vjeçar në qytetin e Peshkopisë pas një konflikti të momentit. Policia njoftoi se Specialistët e Sektorit për Hetimin e Krimeve shpallën në kërkim shtetasin E. E., 19 vjeç, banues në Peshkopi, pasi dyshohet se gjatë një konflikti për motive të dobëta, ka dëmtuar me mjet prerës, një 20-vjeçar, i cili është në kujdesin e mjekëve dhe aktualisht jashtë rrezikut për jetën.
Ndërkohë, një tjetër ngjarje e rëndë u regjistrua në Bulqizë. Sipas policisë, autore e dyshuar është një grua e cila dyshohet se ka plagosur me mjet prerës thikë bashkëshortin e saj.
Në deklaratën e ndarë për mediat, njoftohet se Shërbimet e Komisariatit të Policisë Bulqizë referuan materialet në Prokurori, ku nisi procedimi penal për shtetasen B. Xh, 40 vjeçe, banuese në Bulqizë, pasi dyshohet se ka dëmtuar me mjet prerës, bashkëshortin e saj, i cili është në kujdesin e mjekëve dhe aktualisht jashtë rrezikut për jetën. Në cilësinë e provës materiale, u sekuestrua edhe mjeti prerës. Hetimet për zbardhjen e ngjarjes vijojnë.
