Ka lënë qelinë e burgut në Itali, Moisi Habilaj, kushëriri i largët i ish-ministrit të Brendshëm Saimir Tahiri.
Gjykata e Apelit të Cattanias ka rrëzuar masën e “arrestit me burg” duke e lënë Habilajn në “arrest shtëpie”. Gjatë seancës, Habilaj ka mohuar akuzat në adresë të tij, duke kërkuar lirimin nga qelia.
Gjykata e shkallës së parë e pati dënuar Habilajn me 15 vite e 5 muaj burg.
Edhe 5 të arrestuar të tjerë si pjesë e grupit “Habilaj”, të arrestuar gjatë operacionit “Trëndafili i erërave”, kanë kërkuar rrëzimin e akuzave.
null
Habilaj akuzohej nga Prokuroria e Cattanias si kreu i një rrjeti ndërkombëtar trafiku droge, të cilët kanë trafikuar nga Shqipëria në drejtim të Italisë tonelata me lëndë narkotike marijuanë.
Më herët, Gjykata e Cattanias ka liruar nga burgu edhe financierin e Habilajve, Nezar Seiti. Ky i fundit ka qenë financier i grupit kriminal, që merrej me shpërblimet dhe pagesat që kryheshin për të realizuar trafikun e narkotikeve.
I vetmi nga të arrestuarit që nuk ka kërkuar rishikimin e arrestimit ishte italiani Antonino Riela, i cili sipas dosjes së hetimit rezulton të jetë një nga kontaktet më të besuara në Catania të Moisi Habilajt.
Lidhur me këtë çështje në Itali është pyetur dhe ish-ministri i Brendshëm, Saimir Tahiri, por për shkak të mosgjetjes së provave, çështja ndaj tij është arkivuar. Ndërkohë vëllai i Moisi Habilaj, Florian Habilaj vijon të jetë në kërkim dhe nuk është kapur ende nga policia italiane.
Dënimet e dhëna nga Gjykata e shkallës së parë
Moisi Habilaj – 15 vite e 5 muaj e 10 ditë
Meridian Sula – 8 vite e e 4 muaj
Nezar Seiti – 7 vjet e 4 muaj e 26 ditë
Antonino Riela – 14 vjet e 8 muaj burgim
Vinccenso Spanpinato – 10 vite e 2 muaj burgim
Angjelo Buzaka – 7 vjet e 4 muaj
Xhanluka Pasavanti – 4 vjet burgim dhe 10 mije euro gjobë
Xhuzepe Greko – 2 vjet e 4 muaj burgim dhe 4 700 euro gjobë
