KLOS / LAGJJA “TUMË” ME KULLA SHEKULLORE TË MBULUARA NGA FERRAT
Lagjja “Tum” në fshatin Kurdari, të Bashkisë Klos, para viteve ’90 numëronte deri në 80 familje, ndërsa sot kanë mbetur vetëm 15 familje. Por veçantia e kësaj lagjeje janë kullat rreth 300-vjeçare që kanë mbetur të parestauruara, madje një pjesë të shembura e një pjesë të mbuluara nga ferrat. Ish-banorë të kësaj lagjeje na thonë se lagjja “Tum” e kurdarisë të ngjante me lagjet e qytetit të gurtë të Gjirokastrës, nga strukturat e kullave dhe rrugët e shtruara me kalldrëm. Bedrie Mellani, na thotë se për nga veçoritë që karakterizohet lagjja “Tum” e Kurdarisë, ka tërhequr grupe turistësh që janë shprehur se kullat shumëshekullore duhet të kthehen në bujtina, por një iniciativë e tillë ka munguar si nga pronarët e tyre edhe nga vëmendja e instancave shtetërore.
Edhe ish banori tjetër Nexhmi Mellani thotë se kjo lagje i ka të gjitha resurset natyrore për t’u shndërruar në një lagje tërheqëse për turizmin, pasi nuk mungon uji i pijshëm dhe ai vaditës.
Ndërsa 87-vjeçari Emrella Abdulli ndjen keqardhje që lagjja “Tum” është e braktisur me kulla 300-vjeçare të pajeta, dhe u bën thirrje të rinjve të kthehen aty, ku të gjitha kushtet i kanë për të punuar e jetuar.
