Klos/ Ende asnjë zgjidhje për lagjen “Çupaj”, 15 familje mbeten pa rrugë

15 familje të lagjes Çupaj në fshatin Fshat të Bashkisë së Klosit prej katër muajsh janë pa rrugë automobilistike. Shkak për këtë është bërë shembja e një pjese të vogël të rrugës në hyrje të lagjes si rezultat i shirave të muajit Mars të këtij viti. Një pjesë e rrugës, jo më shumë se dy metra lineare është shembur, ç’ka bën të pamundur që mjetet automobilistike të kalojnë në të. Banorët i kanë kërkuar pushtetit vendor disa herë të ndërhyjë për ndërtimin e një muri, por ata thonë se nuk kanë marrë zgjidhje deri në këto momente. Për shkak të dëmtimit të rrugës banorët kanë patur probleme në transportimin e të sëmurëve apo ju janë vrarë kafshët e ngarkesës. Të gjendur në këto kushte, ata kërkojnë ndërhyrje urgjente në të kundërt do t’i drejtohen kryeministrit Rama.

Kjo lagje e fshatit Fshat është ngjitur me rrugën e Arbrit, ku banorët shpresojnë që do tju sjellë zhvillim ekonomik.