Megjithëse është një sektor i cili po përballet me vështirësi të shumta, ka ende fermerë që nuk heqin dorë nga bujqësia. Naim Topalli, nga fshati Vojnik i Njësisë Administrative Maqellarë në Dibër, jo vetëm nuk ka hequr dorë nga bujqësia, por po shton çdo vit mjetet agregate. Naimi tregon se vitet e fundit puna në bujqësi ka rënë ndjeshëm, pasi fshatarët nuk po e punojnë më tokën për arsye të ndryshme që lidhen me koston si dhe me largimin masiv të të rinjëve. Por edhe pse në këto kushte, ai shprehet se nuk do ta braktisë këtë punë pasi ka investuar në blerjen e makinerive bujqësore për shumë procese. Naim Topalli shprehet se me rikthimin edhe të djalit të tij nga italia për të jetuar në vendin tonë, dëshiron që tja transferojë si zanat në mënyrë që të sigurojë të ardhura ekonomike këtu në vendlindje.
Punimet e pranverës ende nuk kanë nisur, ndërsa Naimi shpreson që këtë vit të ketë më shumë kërkesa për të punuar tokën jo vetëm në fshatin e tij por edhe fshatra të tjerë të Dibrës e Bulqizës.