Gërdeci: Avokati Matlija Kërkon Drejtësi për Të Gjithë Zinxhirin Vendimmarrës, Provat Të Mjaftueshme për Mediu
Avokati i familjarëve të viktimave të Gërdecit, Dorian Matlija, ka deklaruar se provat janë të mjaftueshme që Fatmir Mediu të gjykohet për çështjen e Gërdecit. Matlija theksoi se përgjegjësia duhet të shtrihet në të gjithë zinxhirin vendimmarrës, deri te ministri i Mbrojtjes.
Sipas avokatit, edhe pse kanë kaluar shumë vite nga tragjedia, për familjarët e viktimave kjo mbetet një çështje e hapur që kërkon drejtësi të plotë.
"Ka pasur problemin e sigurisë dhe standardet e sigurisë së rëna për tokë. Ka pasur dhe shumë të pandehur të tjerë që janë dënuar dhe kanë dalë të pafajshëm. Ka 4 persona që në gjykimin e parë janë dënuar për shpërdorim detyre dhe Mediu ka mbetur i vetmi person që nuk është gjykuar. Ka 5 persona që prokuroria mendon se janë përgjegjës," u shpreh Matlija.
Ai shtoi se pavarësisht perceptimit të publikut për kalimin e kohës, për familjarët e viktimave kjo është një çështje e pakohshme. "Gërdeci është drejt një fundi të vonuar, duke vendosur para përgjegjësisë jo vetëm ata që kanë lidhje, por edhe zinxhirin administrativ," theksoi avokati.
Matlija argumentoi se në këtë rast nuk mjafton vetëm përgjegjësia e ushtarakëve të nivelit të ulët, por duhet shkuar deri te ministri i Mbrojtjes, pasi çështje të tjera kërkojnë hetimin e gjithë zinxhirit vendimmarrës. "Nuk ka mundësi të prodhosh sot prova të reja, por duhet gjykuar kjo pjesë që ka akuza. Provat janë të mjaftueshme që Mediu të gjykohet," përfundoi ai.
