Janë zhvilluar të dielën të gjitha ndeshjet e javës së 32 të Kampionatit të Kategorisë së Parë në futboll. Ekipi ynë i futbollit “Burreli” u përball në stadiumin “Liri Ballabani” me ekipin e “Valbonës” së Tropojës. Ndonëse ky i fundit është një nga ekipet që bie direkt në kategorinë e dytë, skuadra e drejtuar nga tekniku Ditmar Bicaj e kishte vlerësuar maksimalisht. Takimi is ë dielës është mbyllur me rezultatin “Burreli” 2 e “Valbona” 1.
Kanë qenë miqtë nga Tropoja ata të cilët e kanë gjetur rrjetën të parët duke shënuar me Ballën në minutën e 15. Ndërkohë, matjanët i shënuan golat e fitores në pjesën e dytë me Farrukun në minutën e 51 me penallti dhe Rrokun në minutën e 70.
Takimet e luajtura të dielën e 13 Prillit u mbyllën, Pogradeci – Kukësi 3 me 0, Kastrioti – Apolonia 1 me 1, Lushnja – Korabi 0 me 1, Flamurtari – Erzeni 2 me 0 dhe Besa – Vora 0 me 1.
Kur ka mbatur vetëm një ndeshje nga fundi, tashmë janë mësuar edhe ekipet që ngjiten direkt në Superligë dhe ato që bien në Kategorinë e Dytë. Kështu, falë arritjeve në këtë garë, “Vora” e “Flamurtari” do të luajnë vitin e ardhshëm në Ligën Superiore, ndërsa “Erzeni” dhe “Valbona” zbresin në Kategorinë e Dytë.
