Presidenti i Turqisë, Recep Tayyip Erdogan, u bëri thirrje turqve që të mos blejnë kurrë mallra franceze, ndërsa kërkoi nga udhëheqësit e Bashkimit Evropian që ta ndalin agjendën “anti-islamike” të presidentit të Francës, Emmanuel Macron.
Erdogan ka thënë të shtunën se Macron ka problem me myslimanët dhe se ka nevojë për kontrolle të shëndetit mendor.
Deklarata ka bërë që Franca ta tërheqë ambasadorin e saj nga Ankaraja.
“Njëjtë sikurse ata që thonë: ‘Mos blini mall të markave turke’ në Francë, edhe unë u bëj thirrje qytetarëve të mi nga këtu, që të mos i ndihmojnë kurrë markat franceze ose të mos i blejnë ato”, tha të hënën Erdogan.
Sipas Institutit të Statistikave në Turqi, Franca është burimi i 10-të më i madh i importeve në Turqi dhe tregu i shtatë më i madh për eksportet e Turqisë.
