Elbasani mund me penallti Burrelin, akuza për gjykim të njëanshëm
Është zhvilluar këtë të hënë në stadiumin “Liri Ballabani” të qytetit të Burrelit ndeshja mes skuadrës matjane të futbollit dhe asaj të Elbasanit. Takimi i cili ishte konsideruar shumë i fortë mes dy skuadrave prodhoi raste e polemika sa i përket gjykimit të ndeshjes. Matjanët pretenduan për një penallti të mohuar dhe një gol të anulluar me pretekstin që ishte pozicion jashtë loje. Pjesa e parë u zhvillua në barazpeshë ku të dyja skuadrat nuk patën raste për të shënuar gol, ndërsa dyluftimi u bë kryesisht në mesfushë. Pjesa e dytë solli edhe episode të këtij takimi, ku fillimisht matjanët pretendojnë për mohimin e një penalltie të fituar në minutën e 57 nga Hoti por që për gjyqtarin kryesor, Egli Spahiu ishte jashtë zone.
Por vetëm 8 minuta më vonë për një rast të ngjashëm, kryesori Spahiu vendos për penallti në favor të elbasanllinjëve, ku kapiteni Karakaçi ekzekuton saktë dhe shënon golin e fitores. Kjo shkaktoi indinjatën e matjanëve të cilët akuzuan trupën gjykuese për anshmëri.
Vetëm pak minuta më vonë matjanët fitojnë një goditje dënimi të cilën e ekzekuton kapiteni Stana, ndërsa Farruku e dërgon topin me kokë në rrjetë, por për gjyqtarin anësor Denis Rexha ishte pozicion jashtë loje, e ku mori mbështetjen e kryesorit Egli Spahiu.
Minutat e mbetura nuk sollën ndryshim, duke bërë që gjithçka të mbyllej në shifrat Burreli 0 e Elbasani 1.
