Dhurohen pajisje për spitalin Bashkiak Mat

Në kuadër të projektin “Bashkë për spitalin “Xhavit Mara” Burrel, është finalizuar nisma humanitare nga Elisabeta Gjegji Shehi, një bijë matjane e cila prej vitesh jeton në Francë. Aparatura të ndryshme si dhe bazë tjetër materiale i janë dorëzuar tashmë spitalit bashkiak Mat, ku do të përdoren për nevojat e tij. Këto pajisje do të përdoren në vijim nga mjekët specialist të këtij spitali. Dorëzimi i tyre u shoqërua me një aktivitet ku morën pjesë drejtues të pushtetit vendor, stafi i spitalit bashkiak dhe donatorët. Drejtori i Spitalit Bashkiak Mat, Erion Bala falenderoi donatorët për dhurimin e këtyre pajisjeve.

I pranishëm në këtë aktivitet, Kryetari i bashkisë Mat, Agron Malaj tha se donacione të tilla janë model për të gjithë ndërsa shprehu angazhimin maksimal për të përmirësuar shërbimin ndaj pacientëve dhe kushteve spitalore.

Ndërkohë, Koordinatorja e këtij donacioni njëherësh presidente e shoqatës “Iliria” në Francë, Elisabeta Gjegji Shehi falenderoi të gjitha ata që e mbështetën në këtë projekt.

Në shenjë falenderimi për donacionin e bërë, Kryetari i Bashkisë Mat ju dha drejtuesve të shoqatave që mundësuan këtë donacion, çertifikatë mirënjohje.